Ferfættur prófessor í tannlækningum

Í tannlæknadeildinni í Háskólanum í Norður Karólínu má finna nokkuð óhefðbundinn starfsmann. Hundurinn GRAYSON mætir þar til starfa á hverjum degi til að aðstoða mennska kollega sína. 

„Hún er aðstoðarhundur fyrir krakka sem fara til tannlæknis,“ segir Sigurður Rúnar Sæmundsson, prófessor í og stjórnandi sérnáms í barantannlækningum, „Hugsunin þegar okkur datt þetta í hug var að taka stressið pínulítið úr og verða slakari við að fara til tannlæknis og að minningin að fara til tannlæknis sé góð af því að þetta er tannlæknastofan með hundinn.“

GRAYSON var ráðinn með ráðningasamningi sem prófessor við deildina en Sigurður Rúnar segir að hún sé eini hundurinn sem starfi á tannlæknastofu í bandaríkjunum og líklega sú eina í heiminum. Þetta þekkist þó á spítölum víða í Bandaríkjunum.

„Þetta er notað nokkuð á spítölum hérna úti fyrir börn og fullorðna sem eru að ganga í gegnum erfiða hluti inni á spítölunum og hugmyndin var afhverju ekki að nota svipaða tækni á tannlæknastofunni.“

Hér að neðan má sjá viðtalið við Sigurð í heild sinni.

GRAYSON hlaut þjálfun hjá fanga í fangelsi í Vestur-Virginíu og síðar hjá samtökunum Paws4People sem sérhæfa sig í að þjálfa hunda sem aðstoða fólk. Til dæmis blindrahunda og kvíðahunda. GRAYSON er margt til lista lagt. Hún getur til dæmis kveikt ljósin, opnað og lokað dyrum og ísskápum. Sigurður Rúnar segir þetta gefast afar vel og að börnin njóti þess ap heimsækja GRAYSON. 

„Þetta hefur virkað alveg súper vel,“ segir hann. „Allir krakkar eru alveg súper ánægðir með þetta. einstaka krakkar eru hrædd við hunda eða varkár gagnvart þeim. Þá sleppum við bara að hafa hundinn eða, af því að þetta er svo vel upp alinn hundur, að þau ná að takast á við sinn ótta við hunda.“ Það eru ekki bara krakkarnir sem umgangast GRAYSON en margir fullorðnir biðja um það einnig. 

Hann mælir með því að fleiri tannlæknastofur skoði þann möguleika að ráða hunda á stofuna.

„Þetta er gagnlegt fyrir börnin sem eru að fara til tannlæknis og fullorðna líka,“ segir Sigurður. „Þetta er í raun og veru alger sólskyn inn á tannlæknastofuna alla. Allir eru svo miklu glaðari og ánægðari fyrir vikið“