Guðmundur Spartakus til Íslands vegna máls gegn Atla Má

„Ég treysti Landsrétti til að komast að réttri lögfræðilegri niðurstöðu í málinu. Fullkomlega,“ segir Vilhjálmur H. Vilhjálmsson lögmaður í samtali við Vísi. Hann var spurður af hverju hann telji að vænta megi annarrar niðurstöðu þar en í héraði? Vilhjálmur segist einfaldlega telja þann dóm rangan.

Guðmundur Spartakus Ómarsson, skjólstæðingur hans, sem búsettur er í Suður-Ameríku, er væntanlegur til landsins fljótlega á næsta ári og mun bera gefa skýrslu. Hann áfrýjaði máli sem hann hafði höfðað á hendur Atla Má Gylfasyni vegna ærumeiðinga sem hann taldi fyrirliggjandi. Atli Már var hins vegar sýknaður í héraðsdómi Reykjaness í vor.

RÚV samdi sig frá málinu

Þá hafði Vilhjálmur farið fram á 10 milljónir í miskabætur vegna þess sem hann telur vera tilhæfulausan fréttaflutning Atla Más um Guðmund Spartakus. Auk þess var farið fram á ómerkingu á „ærumeiðandi ummælum og greiðslu miskabóta vegna ítrekaðra ærumeiðinga og brota á friðhelgi einkalífs stefnanda, í fréttum sem birtar voru í fjölmiðlum meðstefnda Stundarinnar, í útvarpsþættinum Harmageddon og í viðtali í hljóði og mynd á Facebook og www.sudurnes.net, dagana 1. 2. og 30. desember 2016,“ eins og sagði í stefnu. Alls er um 30 ummæli að ræða.

Málið og ýmsir þættir þess vöktu mikla athygli á árinu sem er að líða. Til að mynda hafði Ríkisútvarpið samið sig frá málinu og greitt 2,5 milljónir fyrir það en að því tilskyldu að ekki þyrfti að draga fréttirnar til baka eða biðjast afsökunar á þeim. Páll Magnússon alþingismaður, og fyrrverandi útvarpsstjóri, taldi þann gjörning fyrir neðan allar hellur af hálfu stofnunarinnar. Þá hefur Vísir heimildir fyrir því að sú afgreiðsla hafi ekki lagst vel í fréttamenn stofnunarinnar.

Einkum var það fréttamaðurinn Jóhann Hlíðar Harðarson sem hafði fjallað um Guðmund Spartakus á vettvangi Ríkisútvarpsins en hann vitnaði í fréttir blaðamannsins Cándido Figueredo Ruiz   … „sem hefur fjallað um umsvif eiturlyfjastarfsemi í Paragvæ og Brasilíu í rúm 20 ár fullyrðir að Guðmundur Spartakus sé við hestaheilsu og að hann sé afar valdamikill í innsta hring eiturlyfjaviðskipta í þessum löndum.“

Þessi frétt stendur en hún kostaði RÚV sitt.

Verjandi Atla Más forvitinn um Guðmund Spartakus

Eitt af mörgu sem vakti athygli í þessu viðamikla máli öllu var að Guðmundur Spartakus mætti ekki til að vera viðstaddur réttarhöldin í Héraðsdómi Reykjaness. Gunnar Ingi Jóhannsson hæstaréttarlögmaður, verjandi Atla Más í málinu, sagist þá, í samtali við Vísi ekki skilja hvers vegna Guðmundur vildi ekki koma fyrir dóm.

„Það er búið að skora á hann að koma fyrir dóm og gefa skýrslu, en hann vill ekki verða við því. Og hann vill ekki koma og segja frá því hvernig þetta hefur hitt hann illa fyrir, þessi umfjöllun, að hvaða leyti. Hann hefur ekki gefið neinar skýringar á því.“

Gunnar Ingi sagði að upplýsandi gæti reynst að spyrja hann út í þessar ferðir hans þarna erlendis. „Því var lýst yfir af hans lögmanni að hann ræki kalkverksmiðju í Paragvæ; af hverju hann telji að fjölmiðar í Paragvæ séu að bendla hann við ólögmæta starfsemi? Af hverju hann hafi dregist inn í slíka umræðu ef þetta er uppspuni?“ sagði Gunnar Ingi.

Nú liggur hins vegar fyrir að Guðmundur Spartakus mun mæta til landsins. Málið er enn ekki komið á dagskrá Landsréttar, en fyrir liggur málaskrá fram í febrúar þannig að ljóst er að ekki verður það fyrir þann tíma.