Fótbolti

Barcelona dagar Dembele: Dæmisaga um gildrur ungra knattspyrnumanna í dag

Óskar Ófeigur Jónsson skrifar
Ousmane Dembele og Lionel Messi.
Ousmane Dembele og Lionel Messi. Vísir/Getty
Ousmane Dembele er frábær fótboltamaður með framtíðina fyrir sér í boltanum. Hér er á ferðinni hæfileikaríkur leikmaður sem getur orðið einn sá besti heimi. Fréttirnir af stráknum í dag snúast hinsvegar flestar um agavandamál, óánægju og skróp á æfingar.

Barcelona keypti Ousmane Dembele frá Borussia Dortmund í ágúst 2017 fyrir upphæð sem verður á endanum um 135,5 milljónir punda. Hann átti að fylla í skarðið sem Neymar skildi eftir sig þegar hann fór til Paris Saint-Germain.

Ousmane Dembele skoraði eitt marka Barcelona í 4-0 sigri á nágrönnunum í Espanyol um síðustu helgi en fyrstu fréttir frá Barcelona daginn eftir leik var að strákurinn mætti tveimur klukkutímum of seint á æfingu.

„Hann hefur hæfileika og við erum að reyna að hjálpa honum,“ sagði Ernesto Valverde, þjálfari Barcelona á blaðamannafundi fyrir leikinn á móti Tottenham í Meistaradeildinni í kvöld.





Ernesto Valverde lagði jafnframt áherslu á það að Barcelona ætli að reyna að leysa vandamál Ousmane Dembele innanhúss.

Þetta er ekki í fyrsta sinn sem Ousmane Dembele skrópar eða mætir of seint á æfingu. Afsakanir hans eru líka oft mjög skrautlegar. Guillem Balague þekkir vel til á Spáni og skrifar um Ousmane Dembele í nýjum pistil sínum á BBC.

Spænskir blaðamann hafa haft úr nógu að taka þegar kemur að fréttum af vandræðum þessa 21 árs Frakka. Allir hafa líka áhuga því inn á milli heillar hann alla upp úr skónum með frábærum tilþrifum inn á fótboltavellinum.

Samkvæmt pistli Balague þá má líta á daga Ousmane Dembele í Barcelona sem dæmisögu um allar þær gildrur sem bíða ungra efnilegra knattspyrnumanna í dag.

Það hefur verið eitthvað vesen á því hvar Ousmane Dembele hefur búið þennan tíma hans í Barcelona, vinir hans hafa verið allt annað en hjálpsamir að koma honum á réttu brautina, strákurinn eyðir alltof mörgum klukkutímum í að spila tölvuleiki og þá hefur honum gengið mjög illa að læra spænskuna.

Allt þetta hefur orsakað það að Dembele hefur ekki passað inn í menninguna hjá Barcelona þar sem stærsti hluti leikmanna liðsins hafa alist upp hjá félaginu frá því að þeir voru stráklingar. Já Ousmane Dembele er svolítið utangátta meðal La Masia mannanna hjá Barca.





Þetta er engin afsökun fyrir hegðun Ousmane Dembele heldur tilraun Guillem Balague til að útskýra þessa furðuleg hegðun stráksins þessa átján mánuði hans í Katalóníu.

Ofan á þetta er það vandmálið hjá Dembele að komast í liðið hjá Barcelona sem er allt annað en létt verk enda leikmannahópurinn uppfullur að mörgum af bestu knattspyrnumönnum heims.

Dembele finnst hann ekki fá þá virðingu sem hann eigi skilið og vill fara frá Barcelona. Hann fær hinsvegar enga sérmeðferð hjá Barcelona þrátt fyrir að vera möguleg framtíðarstjarna félagsins. Hjá Barca þurfa menn að vinna sér inn virðingu með frammistöðu sinni og hegðun innan sem utan vallar.





Mörg félög í Evrópu, ekki síst á Englandi, fylgjast vel með þróun mála hjá Ousmane Dembele. Hann er frábær liðstyrkur fyrir hvaða lið sem er en aðeins ef hann hegðar sér eins og atvinnumaður í knattspyrnu en ekki eins of dekurdrengur með unglingaveikina.

Ousmane Dembele hefur verið níu sinnum í byrjunarliði Barcelona í spænsku deildinni en er með 6 mörk og 3 stoðsendingar. Fínasta tölfræði. Hann er síðan með eitt mark og eina stoðsendingu í þremur leikjum í Meistaradeildinni en tveir af þeim komu á mótoi PSV Eindhoven.

Það eru allir líkur á því að þeir Luis Suarez og Lionel Messi verði hvíldir í kvöld og leikurinn á móti Tottenham ætti því að vera kjörið tækifæri fyrir Ousmane Dembele að sýna öllum snilli sína.

Hvort hegðun hans í aðdraganda leiksins eigi eftir að hafa af honum það tækifæri er undir fyrrnefndum Ernesto Valverde komið og kemur ekki í ljós fyrr en í kvöld.

Leikur Barcelona og Tottenham fer fram á Nývangi í Barcelona, hefst klukkan 20.00 og verður sýndur beint á Stöð 2 Sport 3.







Meistaradeild Evrópu Spænski boltinn

Mest lesið


Fleiri fréttir

Sjá meira


×

Mest lesið