Herlög afnumin í Úkraínu

Herlög hafa verið afnumin í Úkraínu en þau hafa verið í gildi síðustu 30 daga. Lögin voru sett í 10 af 27 héruðum landsins við strendur Svartahafsins að beiðni forsetans Petro Poroshenko eftir að Rússar tóku þrjú úkraínsk skip með hervaldi nálægt Kersh-sundi.

Með lögunum voru ákvæði laga og stjórnarskrár, einkum um persónu-og eignaréttindi, afnumin tímabundið. Á meðan herlögin voru í gildi gátu stjórnvöld ritskoðað fjölmiðla og gripið inn í mótmælafundi. 

Poroshenko hafði gefið það út fyrr í mánuðinum að ekki stæði til að framlengja gildistíma þeirra nema stór árás kæmi frá Rússum á þeim tíma en ekki kom til þess.