Tölvutek sektað um 250 þúsund krónur

Raftækjaverslunin Tölvutek hlaut í desember 250 þúsund króna stjórnvaldssekt vegna þess sem Neytendastofa taldi villandi fullyrðing í auglýsingaefni fyrirtækisins.

Fram kemur á vef Neytendastofu að Tölvutek hafi sagst í auglýsingabæklingi sínum vera „umboðsaðili fyrir mörg stærstu tölvumerki heims.“ Neytendastofa hafi því gert Tölvutek grein fyrir að fáist fullyrðingar um að auglýsandi sé umboðsaðili ekki staðist geti það verið til þess að brjóta gegn reglum um óréttmæta viðskiptahætti.

Í svari fyrirtækisins við umkvörtunum Neytendastofu kom fram að fullyrðingin væri almenns eðlis og ekki hafi verið vísað til neinna sérstakra merkja annarra en þeirra sem fram koma á sömu blaðsíðu og umrædd fullyrðing.

„Í ljósi þess að Tölvutek færði ekki fram nein gögn sem sýndu fram á að félagið væri viðurkenndur umboðsaðili umræddra merkja hefur Neytendastofa bannað fyrirtækinu frekari birtingu umræddrar fullyrðingar,“ segir um stjórnvaldssektina en ákvörðun Neytendastofu má nálgast hér.