Tyrkneski Messi hefur áhuga á að fara til Liverpool

Efnilegasti leikmaður Tyrklands, hinn 19 ára gamli Abdulkadir Omur, er orðaður við Liverpool þessa dagana og sjálfur hefur strákurinn áhuga á því að fara þangað.

Omur spilar með Trabzonspor í heimalandinu og tyrkneskir fjölmiðlar segja að Liverpool sé þegar búið að gera tilboð í hann.

„Liverpool er frábært félag. Eitt það besta í heiminum. Trabzonspor þarf að skoða þetta tilboð alvarlega,“ sagði Omur sem bíður nú eftir því að mega ræða við enska félagið.

Tyrkneskir fjölmiðlar bera hann reglulega saman við sjálfan Lionel Messi og kalla hann tyrkneska Messi

„Sumir vilja bera okkur saman. Hann er besti fótboltamaður heims og að vera líkt við hann er ótrúlegt,“ sagði strákurinn sem er samningsbundinn Trabzonspor til 2022.