Fóru ekki eftir fyrirmælum og eignuðust þríbura

Um allan heim eru hjón og pör sem reyna að eignast barn, oft með misjöfnum árangri. Hjá sumum pörum tekst það í fyrstu tilraun en hjá öðrum reynist það oft þrautinni þyngri. Slíkt var uppi á teningum hjá hjónunum Betty og Pawel Bienias frá bænum Corsham í Englandi.

Betty og Pawel höfðu í sjö ár reynt að eignast barn með náttúrulegum hætti. Eftir sjö ár af tilraunum leituðu þau sér aðstoðar og völdu að reyna tæknifrjóvgun. Skömmu síðar kom í ljós að tæknifrjóvgunin hafði borið árangur, meiri árangur en hjónin bjuggust við. BBC ræddi við Betty Bienias sem sagði sögu sína, mánuði eftir barnsburð.

„Hjúkrunarfræðingurinn sneri sér að manninum mínum og spurði hann hvort hann vildi fá sér sæti áður en hún segði honum fréttirnar, “ sagði Betty og bætti við að hjúkrunarfræðingurinn hafði aldrei á ferlinum séð tilvik sem þetta. Betty var ófrísk af þríburum.

Í ljós kom að Bienias hjónin hefðu ekki fylgt fyrirmælum læknanna í einu og öllu. Læknar höfðu ráðlagt þeim að lifa skírlífi á meðan að læknar aðstoðuðu þau með tæknifrjóvgun.

Það gerðu þau þó ekki að sögn Betty og var niðurstaðan sú að þegar læknar komu fyrir frjóvguðu eggi í legi hennar var hún nú þegar ófrísk að tvíburum. Því eru hjónin nú foreldrar þriggja ungabarna eftir sjö ára þrekraun.