Körfubolti

Steve Kerr rekinn út úr húsi í tapi meistara Golden State

Óskar Ófeigur Jónsson skrifar
Brosandi Kevin Durant hjálpar þjálfara sínum Steve Kerr af velli eftir að Kerr hafði verið rekinn út úr húsi.
Brosandi Kevin Durant hjálpar þjálfara sínum Steve Kerr af velli eftir að Kerr hafði verið rekinn út úr húsi. AP/Steve Dykes
Fimm leikja sigurganga Golden State Warriors endaði í nótt með tapi á móti Portland Trail Blazers. 42 stig frá James Harden dugðu ekki Houston Rockets liðinu og þeir Giannis Antetokounmpo og Nikola Jokic voru með flottar þrennur í endurkomusigrum sinna liða.





Kevin Durant og Stephen Curry voru báðir 32 stig stig í liði Golden State Warriors en það skilaði ekki sigri því liðið steinlá 129-107 á móti Portland Trail Blazers eftir að hafa tapað lokaleikhlutanum 35-12. Hvorki Durant eða Curry skoruðu stig í fjórða leikhlutanum.

Enginn annar en Durant og Curry í liði Golden State Warriors skoraði heldur yfir tíu stig og Steve Kerr, þjálfari Golden State Warriors, missti síðan stjórn á sér í öllu mótlætinu í lokin og lét henda sér út úr húsi fyrir að mótmæla hraustlega óíþróttamannslegri villu á Draymond Green.





Damian Lillard skoraði 29 stig fyrir Portland en þetta var sameinað átak hjá liðinu þar sem átta leikmenn skoruðu tíu stig eða meira. Jake Layman kom með 17 stig inn af bekknum og varð næststigahæstur. Lillard hitti úr 6 af 8 þriggja stiga skotum og var með 8 stoðsendingar og engan tapaðan bolta.

Stephen Curry tapaði þar sem fyrir litla bróður sínum Seth Curry sem skoraði ellefu stig í þessum leik en náði ekki að setja niður þriggja stiga skot.





James Harden skoraði 42 stig en það dugði skammt því Houston Rockets tapaði 121-111 á móti Minnesota Timberwolves. Jeff Teague skoraði 27 stig og tók 12 fráköst, Karl-Anthony Towns skoraði 25 stig.

„Þetta voru ekki góð 42 stig. Þetta voru ekki svona 42 stig eins og hann hefur verið að skora að undanförnu. Hann þurfti að vinna fyrir þessum,“ sagði Karl-Anthony Towns um stigaskor Harden eftir leikinn. Þetta var 31. leikur Harden í röð með 30 stig eða meira en að þessu sinni hitti hann úr 8 af 22 þriggja stiga skotum.





Pascal Siakam er ekki þekktasta nafnið í boltanum en frammistaða hans með Toronto Raptors í vetur er hægt og rólega að breyta því. Siakam setti nýtt persónulegt met í nótt með því að skora 44 stig og taka 10 fráköst í 129-120 sigri Toronto Raptors á Washington Wizards.

„Ef hann heldur áfram að spila svona þá verður hann í Stjörnuleiknum 2020,“ sagði Scott Brooks, þjálfari Washington Wizards um Pascal Siakam sem er á þriðja ári í NBA-deildinni.

Toronto-liðið hvíldi Kawhi Leonard í leiknum en liðið hefur unnið 13 af 16 leikjum sínum án hans í vetur. Serge Ibaka var með 10 stig og 13 fráköst og Kyle Lowry skoraði 14 stig og gaf 13 stoðsendingar.  Þetta var sjötti sigur Toronto í röð.





Nikola Jokic skoraði sigurkörfuna þegar Denver Nuggets vann 120-118 sigur á Sacramento Kings en þessi frábæri leikmaður endaði með 20 stig, 18 fráköst og 11 stoðsendingar í leiknum. Denver vann upp 17 stiga forskot Kings í leiknum.





Giannis Antetokounmpo átti enn einn stórleikinn þegar Milwaukee Bucks vann 106-97 útisigur á Indiana Pacers. Antetokounmpo endaði með 33 stig, 19 frákös og 11 stoðsendingar og sá til þess að Bucks liðið verður með bestan árangur í Austurdeildinni á Stjörnuleikshelginni.

Milwaukee var tíu stigum undir í fjórða leikhlutanum en þá tók Giannis yfir og var með 12 stig, 6 fráköst og 3 stoðsendingar á síðustu ellefu og hálfri mínútu leiksins. Þetta var þrettándi leikur Grikkjans með að minnsta kosti 25 stig, 15 fráköst og 5 stoðsendingar og jafnaði þar með afrek Shaquille O'Neal.





Dwyane Wade kom sterkur inn af bekknum með 22 stig í 112-101 útisigri Miami Heat á Dallas Mavericks. Nýliðinn Luka Doncic var með 18 stig, 12 fráköst og 9 stoðsendingar fyrir Dallas og rétt missti af fjórðu þrennu sinni á tímabilinu.





D'Angelo Russell skoraði 14 af 36 stigum sínum í þriðju framlengingunni þegar Brooklyn Nets vann 148-139 sigur á Cleveland Cavaliers í þríframlengdum leik. Jordan Clarkson skoraði 42 stig fyrir Cleveland.













Úrslitin í NBA-deildinni í nótt:

Portland Trail Blazers - Golden State Warriors 129-107

Los Angeles Clippers - Phoenix Suns    134-107    

Denver Nuggets - Sacramento Kings    120-118    

Dallas Mavericks - Miami Heat    101-112    

Chicago Bulls - Memphis Grizzlies    122-110    

Minnesota Timberwolves - Houston Rockets    121-111    

Boston Celtics - Detroit Pistons    118-110    

New York Knicks - Philadelphia 76ers    111-126    

Toronto Raptors - Washington Wizards    129-120    

Cleveland Cavaliers - Brooklyn Nets    139-148 (109-109)    

Indiana Pacers - Milwaukee Bucks    97-106    

NBA

Mest lesið


Fleiri fréttir

Sjá meira


×

Mest lesið