Ólögleg sala fæðubótaefna og lyfja kærð til lögreglu

Matvælastofnun í samvinnu við Lyfjastofnun hafa kært vef með íslensku léni til lögreglu en á vefnum eru auglýst til sölu ólögleg fæðubótarefni og lyf að því er fram kemur í tilkynningu frá MAST. Farið hefur verið fram á að vefnum verði lokað en rétthafi lénsins er skráður í Mið-Ameríku. 

Þá varar MAST við viðskiptum við vefinn roidstop.is og neyslu fæðubótarefna og lyfja sem þar séu til sölu og eru neytendur hvattir til að vera á varðbergi þegar kemur að kaupum á fæðubótaefnum og lyfjum á netinu. Grunur er um að nýlegt andlát hér á landi megi rekja til inntöku á Nootropics, en á síðunni eru til sölu efni á borð við DNP og Nootropics að því er segir í tilkynningu MAST. Þá er vitnað til nýlegs dóms í Bretlandi vegna dauðsfalls ungrar stúlku sem hafði neytt DNP en sölumaður efnisins hlaut 7 ára fangelsisdóm fyrir manndráp af gáleysi fyrir að selja efni sem er hættulegt til manneldis.