Páll frábiður sér það að vera stimplaður rasisti

Páll Magnússon þingmaður Sjálfstæðisflokksins telur illa að sér vegið að vera tengdur við rasisma og fordóma fyrir það eitt að gagnrýna umgengni við styttu Jóns Sigurðssonar.

„Menn verða að fá að segja það sem þeim finnst. Að fá á sig einhverja rasista- og fordómaásakanir fyrir það eitt að vilja bera virðingu fyrir þessa styttu og það sem hún stendur fyrir, mér finnst það bara ganga út yfir allan þjófabálk,“ segir Páll í samtali við Vísi.

Þingmaðurinn telur umræðuna vera orðna alltof pólaríseraða og tiltekinn hóp veifa rasistaspjaldinu í tíma og ótíma. „Já, mér finnst fólk vera býsna fljótt til að nota orð eins og raistar, fordómar, kynþáttafordómar … það verður að vera hægt að ræða hluti og gagnrýna án þess að eiga yfir höfði sér stimplanir úr þessari átt.“

Til háborinnar skammar

Mótmæli hælisleitenda og samtakanna No Borders víða um borg, einkum á Austurvelli, hafa verið í deiglunni undanfarna daga. Í samantekt Aðalheiðar Ámundadóttur blaðamanns segir að neikvæðar athugasemdir í garð hælisleitenda og mótmælenda hrannast upp í hundraðatali við færslur alþingismanna og annarra áhrifamanna á samfélagsmiðlum sem beina gagnrýni ýmist að borgaryfirvöldum, forsætisnefnd Alþingis eða lögreglu.

„Er það ekki síst meintur sóðaskapur og vanvirðing við styttuna af Jóni Sigurðssyni sem rennur mönnum til rifja. Meðal þeirra sem kvatt hafa sér hljóðs í umræðunni eru Björn Bjarnason, fyrrverandi dómsmálaráðherra, Helgi Magnús Gunnarsson vararíkissaksóknari, Hannes Hólmsteinn Gissurarson, prófessor í stjórnmálafræði, Ólafur Ísleifsson, þingmaður Miðflokksins, og Páll Magnússon, þingmaður Sjálfstæðisflokksins.“

Páll birti í vikunni mynd af styttunni á Austurvelli með svohljóðandi ummælum: „Þetta er til háborinnar skammar! Er þessi umgengni um styttuna af Jóni Sigurðssyni í boði Reykjavíkurborgar?“

Þegar þetta er skrifað hafa 190 ummæli verið skráð við þá færslu Páls og hefur henni verið deilt 38 sinnum. Fjölmargir taka í sama streng og Páll og telja þetta mikið virðingarleysi. En, nokkur ummælanna má túlka sem svo að þau lýsi útlendingaandúð: „Burtu með þetta lið.“

Vill engan subbuskap á sinni síðu

Páll segir að gera verði skýran greinarmun á gangrýni hans sem snýr að umgengni og svo meintum rasisma.

„Ef menn lesa þessa Facebook-færslu þá er ég að gera athugasemd við umgengni við styttu Jóns Sigurðssonar. Ég er ekki að fetta fingur út í mótmæli hælisleitenda á Austurvelli. Þau hafa farið friðsamlega fram. Heldur hvernig gengið var um styttu Jóns Sigurðssonar, hvort þetta sé gert með samþykki borgarinnar? Það er borgarinnar, í samráði við lögreglu, að fylgja eftir lögreglusamþykktum. Ég get haft samúð með málsstað hælisleitenda en get jafnframt gagnrýnt umgengnina. Ég er enginn rasisti fyrir það.“

En, ummælin sem hafa verið sett fram á þinni Facebooksíðu, hvað sýnist þér um þau?

„Já, með þessi ummæli þá er þetta þannig að ég hef sjálfur ekki lesið kannski hver einustu ummæli sem spunnust á þennan þráð út af þeirri athugasemd sem ég gerði við umgengina við styttuna. Stundum þegar ég hef sagt skoðanir mínar á Facebook og það koma ummæli sem mér finnst óviðurkvæmileg, þá hendi ég þeim út. Ég vil engan subbuskap á minni síðu. En sjálfur hef ég ekki séð neinn þann dólgsskap nú að ég hafi séð ástæðu til að henda því út.“

Gusað yfir fólk orðleppum

Páll leggur á það ríka áherslu að gagnrýni hans snúi ekki að hælisleitendum sem slíkum.

„Mín vegna gætu þetta alveg eins verið einhverjar hreinræktaðar íslenskar fyllibyttur. Það að gagnrýna umgengni við styttu sem okkur þykir vegna sögunnar vænt um, í því felast bara engir fordómar, takk fyrir. Það gætu allt eins verið Íslendingar sem hafa leikið styttuna svona.

Ég frábið mér að það sé gusað yfir fólk orðaleppum af þessu tagi vegna hófstilltrar umræðu.“

Samkvæmt áðurnefndri samantekt Aðalheiðar er stefnt að því að fram fari fundur allsherjar- og menntamálanefndar í fyrramálið vegna meints harðræðis lögreglu við mótmælendur. Þetta er vegna kröfu þingmannanna Þórhildar Sunnu Ævarsdóttur, Guðmundar Andra Thorssonar og Jóns Steindórs Valdimarssonar. Páll segir að það sé ekki alveg frágengið, fundurinn er ekki kominn á dagskrá vegna þess að gestir sem boðaðir hafa verið á fundinn hafa ekki getað staðfest komu sína. En, það ætti að liggja fyrir seinna í dag.