Róbert kjörinn varaforseti MDE

Róbert Spanó var kjörinn varaforseti Mannréttindadómstóls Evrópu í gær. Allir 47 dómarar réttarins tóku þátt í kosningunni en valið stóð milli hans og portúgalska dómarans Paulo Pinto de Albuquerque, sem hefur verið dómari við réttinn frá því í apríl 2011 eða tveimur árum lengur en Róbert.

Róbert hefur verið dómari við réttinn frá árinu 2013 og var kjörinn forseti sinnar dómdeildar í maí 2017.

Nýr forseti dómstólsins var einnig kjörinn í gær, hinn gríski LinosAlexandre Sicilianos, sem gegnt hefur stöðu varaforseta við dóminn frá árinu 2017. Hann tók sæti við réttinn í maí 2011 og á því rúmlega ár eftir af tímabili sínu þar.