Stórbætt vörn skilaði Philadelphia sigri | Myndbönd

Philadelphia 76ers jafnaði metin í einvíginu gegn Toronto Raptors, 1-1, í undanúrslitum Austurdeildar NBA með sigri í öðrum leik liðanna í nótt, 89-94.

Varnarleikur Philadelphia var mun sterkari en í fyrsta leiknum. Kawhi Leonard skoraði reyndar 35 stig fyrir Toronto en aðrir höfðu hægar um sig.

Jimmy Butler skoraði 30 stig fyrir Philadelphia í nótt. Joel Embiid var nokkuð rólegur með tólf stig en skoraði afar mikilvæga körfu undir lok leiks.

Þrátt fyrir að vera nýkomnir úr sjö leikja rimmu gegn San Antonio Spurs vann Denver Nuggets sigur á Portland Trail Blazers, 121-113, í fyrsta leik liðanna í undanúrslitum Vesturdeildarinnar í nótt.

Nikola Jokic skoraði 37 stig fyrir Denver. Hann hitti úr ellefu af 18 skotum sínum utan af velli og nýtti öll tólf vítin sín. Jamal Murray skoraði 23 stig fyrir Denver og gaf átta stoðsendingar.

Damian Lillard fór mikinn í liði Portland og skoraði 39 stig. Enes Kanter skoraði 26 stig úr aðeins 14 skotum.