Theodór er fjall af manni og spilaði síðast með nýliðum Fjölnis í Olís-deildinni veturinn 2017/2018 en á þessari leiktíð hefur hann verið í fríi og einbeitt sér að handboltahlaðvarpinu Handkastið sem hefur notið mikilla vinsælda.
Meðstjórnandi hans í hlaðvarpsþættinum er Arnar Daði Arnarsson, 27 ára gamall uppalinn Haukamaður og fyrrverandi unglingalandsliðsmaður, sem lagði skóna snemma á hilluna og hefur þjálfað lengi hjá Val og unnið marga titla sem yngri flokka þjálfari.
Arnar Daði var einmitt ráðinn þjálfari Gróttunnar á dögunum og eru því báðir stjórnendur hlaðvarpsþáttarins mættir til Seltirninga og verða í lykilstöðum næsta vetur, Arnar á hliðarlínunni og Theodór á línunni.
Samhliða því að ráða Arnar Daða til starfa framlengdi félagið samninginn við Daða Laxdal en það er mikill styrkur fyrir Gróttu að halda honum í baráttunni í næst efstu deild.
