Tuttugu gráður í kortunum næstu daga

Það eru prýðilegar hitatölur í kortunum fyrir allt land út vikuna. Útlit er fyrir „tiltölulega rólega austlæga átt“ í dag, eins og veðurfræðingur á Veðurstofunni kemst að orði. Hann áætlar að sama skapi að það verði væntanlega skýjað að mestu á landinu og skúrir á víð og dreif.

Hitinn verður auk þess á bilinu 7 til 15 stig í dag og hlýjast verður á suðvesturhorninu. Aftur á móti verður hlýjast á Norðausturlandi á morgun eftir nokkuð viðvarandi kuldaskeið á þeim slóðum í sumar.

Það verður jafnframt áfram róleg austlæg átt á morgun, nema við suðurströndina þar sem vindur gæti farið yfir 10 m/s. Þurrt og bjart veður um landið norðaustanvert og þar verður væntanlega hlýjast á morgun, eða allt að 18 til 19 stig. Meira af skýjum í öðrum landshlutum og skúrir á stöku stað.

Veðurstofan áætlar að hitinn muni hækka eftir því sem líður á vikuna. Búist er við því að hitinn nái allt að 20 stigum frá miðvikudegi og eitthvað inn í helgina. Þessu mun þó fylgja einhver úrkoma.

Veðurhorfur á landinu næstu daga

Á þriðjudag:

Austlæg átt 3-8 m/s, bjart með köflum, en skúrir á stöku stað. Austan 8-13 með suðurströndinni og rigning af og til. Hiti víða 12 til 18 stig. 

Á miðvikudag:

Suðaustan 5-10, en 10-15 syðst á landinu. Rigning með köflum um landið sunnanvert, hiti 10 til 15 stig. Þurrt og bjart norðantil með hita að 20 stigum. 

Á fimmtudag:

Suðaustlæg eða breytileg átt 3-10. Bjart með köflum norðan og vestanlands, en líkur á skúrum síðdegis. Hiti 13 til 20 stig. Súld á Suðausturlandi og Austfjörðum og svalara. 

Á föstudag og laugardag:

Hæg suðlæg átt og skýjað, en úrkomulítið. Hiti 11 til 15 stig. Bjart á köflum á Norður- og Austurlandi og stöku skúrir síðdegis, hiti að 20 stigum. 

Á sunnudag:

Sunnanátt með súld og rigningu, en þurrt og hlýtt norðaustantil á landinu.