Fimleikafélagið: Innsýn í líf þjálfara í fjórðu deildinni

Brynjar Ásgeir Guðmundsson spilar ekki einungis allar stöður á vellinum heldur hefur hann einnig tekið að sér þjálfun fjórðu deildarliðsins ÍH. Svo hefst níundi þáttur Fimleikafélagsins.

Fimleikafélagið er þáttur í umsjón Freys Árnasonar þar sem sjónum er beint að leikmönnum meistaraflokks FH í Pepsi Max deild karla og er fókusinn oftar en ekki á líf leikmanna fyrir utan völlinn.

Freyr fylgdi Brynjari Ásgeiri eftir á leikdegi ÍH.

Dagurinn byrjaði ekki vel fyrir Brynjar því hann hafði valið í hóp fyrir leikinn við Kormák/Hvöt kvöldið áður og strax voru þrír búnir að draga sig úr hópnum.

„Þá er bara einn að fara í próf og annar að eignast barn og þriðji gaurinn bara á tónleikum,“ sagði Brynjar.

Eftir því sem leið á daginn kvarnaðist meira úr hópnum hjá Brynjari. Brynjar þurfti að sjá um grill fyrir fótboltaskólann í Kaplakrika og fara sjálfur á æfingu hjá FH á meðan hann reyndi að verða sér úti um framherja til þess að spila fyrir ÍH um kvöldið.

Þegar í leikinn var komið gekk ekki nógu vel hjá ÍH mönnum og þeir töpuðu 2-0. Seinna markið var sjálfsmark frá varamanninum Króla, hann hafði mætt aðeins seint í leikinn því hann var að spila á Secret Solstice fyrr um kvöldið.

Þessa skemmtilegu innsýn inn í líf þjálfara í fjórðu deild karla má sjá í spilaranum hér að ofan.