Blikar hafa ekki tapað í Frostaskjólinu í átta ár

Blikar eru vanir að taka stig með sér heim í Smárann þegar þeir mæta KR-ingum í Vesturbænum. Svo hefur verið raunin undanfarin sjö ár. KR og Breiðablik mætast í toppslag Pepsi Max deildar karla í kvöld.

Leikur KR og Breiðabliks hefst klukkan 19.15 og verður sýndur beint á Stöð 2 Sport. Útsendingin hefst klukkan 18.55 og strax á eftir, eða klukkan 21.15, munu síðan Pepsi Max mörkin gera upp alla umferðina.

KR-ingum hefur ekki tekist að vinna heimaleik á móti Breiðabliki í að verða átta ár eða síðan að KR vann 4-0 sigur á þá ríkjandi Íslandsmeisturum Breiðabliks 24. júlí 2011.

Mörk KR í þeim sigri skoruðu þeir Guðjón Baldvinsson, Skúli Jón Friðgeirsson, Óskar Örn Hauksson og Kjartan Henry Finnbogason.

Hannes Þór Halldórsson, núverandi markvörður Vals, stóð þá í KR-markinu og Bjarni Guðjónsson, núverandi aðstoðarþjálfari liðsins, var með fyrirliðabandið. Óskar Örn og Skúli Jón eru einu leikmenn KR í dag sem voru í byrjunarliðinu í þessum leik en á bekknum voru Gunnar Þór Gunnarsson og Aron Bjarki Jósepsson.

Það var samt nóg af núverandi KR-ingum í liði Blika í þessum leik eða þeir Finnur Orri Margeirsson, Kristinn Jónsson og Arnór Sveinn Aðalsteinsson.

Blikar hefndu fyrir það tap með 4-0 sigri á KR-vellinum árið eftir og síðustu sex deildarleikir liðanna í Frostaskjóli hafa síðan endaði með jafntefli.

KR-liðið vann einmitt bæði Íslands- og bikarmeistaratitilinn síðasta tímabilið sem félagið vann heimaleik á móti Blikum en Rúnar Kristinsson gerði KR að tvöföldum meisturum sumarið 2011. KR hefur hvorki unnið Blika á heimavelli né tvöfalt síðan.

Blikar hafa fengið 22 stig út úr leikjum sínum á móti KR undanfarin sjö sumur en KR-ingar bara 13 stig. Markatalan er 20-13 Blikum í vil.

Blikar á KR-vellinum síðustu sjö ár:

2018 - Jafntefli (1-1)

2017 - Jafntefli (1-1)

2016 - Jafntefli (1-1)

2015 - Jafntefli (0-0)

2014 - Jafntefli (1-1)

2013 - Jafntefli (1-1)

2012 - Sigur (4-0)

Stig KR og Breiðabliks í deildarleikjum liðanna 2012 til 2018:

2018 - Breiðablik 4, KR 1

2017 - KR 4, Breiðablik 1

2016 - Breiðablik 4, KR 1

2015 - Breiðablik 2, KR 2

2014 - KR 4, Breiðablik 1

2013 - Breiðablik 4, KR 1

2012 - Breiðablik 6, KR 0

Samtals: Breiðablik 22, KR 13