Snéri aftur á bekkinn eftir 41 dags krabba­meins­með­ferð

Það var tilfinningaþrungin stund í ítalska boltanum um helgina þegar Sinisa Mihajlovic snéri aftur á hliðarlínuna hjá Bologna.

Þessi 50 ára gamli Serbi var greindur með hvítblæði fyrir sex vikum síðan og hafði verið 41 dag í röð í krabbameinsmeðferð. Hann lét það ekki stöðva sig frá því að stýra liði sínu gegn Verona.

Mihajlovic sagðist ætla að vinna þennan bardaga og lofaði að koma í leikinn um helgina þrátt fyrir stífa lyfjameðferð.

Klukkutíma fyrir leik var staðfest að hann myndi vera á hliðarlínunni. Mörgum til mikillar gleði. Var vel tekið á móti honum og stuðningsmenn beggja liða fögnuðu honum gríðarlega. Leikurinn sjálfur fór svo 1-1.

Mihajlovic hefur náð að fylgjast vel með æfingum liðsins því þær hafa verið sendar beint út fyrir hann. Hann hefur því ekki misst af neinu í sjúkrarúminu og bar sig vel í leiknum.