Alexander með fimm mörk í fyrsta deildarleik Kristjáns með Löwen

Kristján Andrésson stýrði Rhein-Neckar Löwen til sigurs á Ludwigshafen, 23-26, í þýsku úrvalsdeildinni í handbolta í dag. Þetta var fyrsti deildarleikur Löwen undir stjórn Kristjáns sem tók við liðinu í sumar af Dananum Nikolaj Jakobsen.

Alexander Petersson skoraði fimm mörk úr sjö skotum fyrir Ljónin. Uwe Gensheimer var markahæstur með sjö mörk í sínum fyrsta leik fyrir Löwen síðan 2016.

Kiel vann öruggan sigur á Göppingen, 31-24, í fyrsta deildarleiknum undir stjórn Filips Jicha. Tékkinn tók við Kiel af Alfreð Gíslasyni í sumar.

Gísli Þorgeir Kristjánsson var ekki á meðal markaskorara hjá Kiel sem endaði í 2. sæti deildarinnar á síðasta tímabili.

Meistarar síðustu tveggja ára, Flensburg, hófu titilvörnina með sigri á Melsungen á útivelli, 19-24.