Óljóst hvar Mugabe verður grafinn

Óvissa ríkir enn um hvar Robert Mugabe, frelsishetja og síðar einræðisherra Simbabve, verði jarðsettur vegna ósættis milli fjölskyldu hans og stjórnvalda.

Mugabe lést úr veikindum í síðustu viku en samkvæmt talsmanni fjölskyldunnar verður hann grafinn eftir helgi. Fjöldi fólks safnaðist saman við heimili Mugabes í höfuðborginni Harare í dag og voru þeir Emmerson Mnangagwa forseti og Nelson Chamisa, leiðtogi stjórnarandstöðunnar, sem voru báðir miklir andstæðingar Mugabes síðustu æviárin, á meðal þeirra sem minntust hans.

„Þið vitið vel að við áttum samband við herra Mugabe, á pólitíska sviðinu, sem einkenndist af átökum. En við þurfum að líta til framlags hans. Þess vegna erum við komin hingað til að votta Mugabe-fjölskyldunni samúð okkar sem og öllum Simbabvemönnum, öllum í Afríku,“ sagði Chamisa.

Líkkista Mugabes var síðan flutt á Rufaro-íþróttaleikvanginn í Harare þar sem mikill fjöldi kom saman og minntist hins látna.