Heimsklassa ólympísk glíma gegn heimsklassa jiu-jitsu

Það má með sanni segja að alvöru glímubardagi sé á dagskrá þegar UFC heimsækir Singapúr á laugardaginn. Tveir af bestu glímumönnum UFC, þeir Demian Maia og Ben Askren, mætast þá í aðalbardaganum.

Þeir Demian Maia og Ben Askren eru báðir frábærir glímumenn en með ólíka stíla. Demian Maia er einn besti jiu-jitsu maður í sögu MMA og hefur unnið 13 bardaga með uppgjafartaki. Þessi brasilíski bardagamaður er með þá augljósu leikáætlun að taka menn niður og reyna að klára þá með hengingu.

Ben Askren skaraði fram úr í ólympískri glímu og vann tvo titla í efstu deild bandarísku háskólaglímunnar. Hann komst svo á Ólympíuleikana 2008 en komst ekki langt og snéri sér að MMA eftir það.

Líkt og Maia er Askren með augljósa leikáætlun þar sem hann vill bara taka andstæðinga sína niður. Jorge Masvidal las hann því eins og opna bók í sumar og smellhitti með fljúgandi hné. UFC ferill Askren hefur því ekki byrjað eins vel og vonir stóðu til en nú fær hann andstæðing sem vill glíma við sig.

Þar sem báðir eru glímumenn verður virkilega áhugavert að sjá þessa tvo ólíku stíla mætast í búrinu. Askren er tölvuert betri að ná fellum en Maia er betri að klára með uppgjafartaki.

Það verður sennilega erfitt fyrir Maia að taka Askren niður. Maia hefur mætt þremur sterkum glímumönnum (Tyron Woodley, Colby Covington og Kamaru Usman) á undanförnum árum og tókst aldrei að ná þeim niður í 49 tilraunum. Það verður því áhugavert að sjá hvernig glíma þeirra þróast ef þetta fer í gólfið og verður spennandi að sjá stöðubaráttur þeirra í gólfinu.

Átta af tíu sigrum Maia eftir uppgjafartök í UFC hafa verið eftir „rear naked choke“ hengingu þegar hann nær baki andstæðingsins. Stærsti möguleiki Maia er því þegar hann kemst á bak andstæðingsins.

Styrkleikar beggja eru í glímunni og vonandi fer bardaginn fram sem minnst í standandi viðureign. Glíma beggja er svo margfalt betra en boxið hjá þeim að það væri hreinlega synd ef bardaginn færi ekki í gólfið.

Bardaginn verður aðalbardaginn á UFC bardagakvöldinu í Singapúr á laugardaginn. Bardagakvöldið er á besta tíma en aðalhluti bardagakvöldsins hefst kl. 12:00 á Stöð 2 Sport 2.