Íslensku stelpunum „sparkað“ út af Algarve Cup

Íslenska kvennalandsliðið í fótbolta verður ekki á meðal þátttökuþjóða á Algarve Cup í mars.

Ísland hefur verið fastagestur á Algarve Cup kvenna í fótbolta undanfarin þrettán ár en okkar konur fá ekki að vera með í ár.

Knattspyrnusamband Íslands segir frá því á heimasíðu sinni að íslenska liðið hafi verið fórnarlamb niðurskurðar mótshaldara.

A landslið kvenna verður ekki á meðal þátttökuþjóða á Algarve Cup 2020, en Ísland hefur leikið á mótinu samfleytt frá 2007.#dottirhttps://t.co/HJ3DEEVQfY

— Knattspyrnusambandið (@footballiceland) November 29, 2019

„KSÍ sóttist að venju eftir þátttöku liðsins á þessu árlega móti í Portúgal, en mótshaldarar hafa ákveðið að fækka þátttökuliðum niður í 8 lið og er Ísland ekki þar á meðal,“ segir í frétt á heimasíðu sambandsins.

Þar kemur líka fram að vinna sé í fullum gangi að finna annað verkefni fyrir íslenska í mars og vonandi fær íslenska liðið tækifæri til að þróa sinn leik fyrir seinni hlutann í undankeppni EM 2021.

Íslenska kvennalandsliðið hafði verið með í Algarve Cup samfleytt frá árinu 2007 eða í þrettán mótum í röð.