Ensku félögin eiga vandasamt verkefni fyrir höndum að sannfæra áhyggjufulla leikmenn

Daily Mail greinir frá því á vef sínum í morgun að næstu tveir dagar munu skera úr um það hvort að leikmenn ensku úrvalsdeildarinnar séu tilbúnir að byrja spila aftur á tímum kórónuveirunnar.

Í ræðu ríkisstjórnarinnar í gær kom fram að allar líkur eru á því að enska úrvalsdeildin gæti farið að rúlla aftur eftir 1. júní en þó bakvið luktar dyr. Margir leikmennirnir eru þó ekki taldir spenntir á að byrja tímabilið.

Félögin munu eiga samtöl við leikmenn sína næstu tvo sólahringa en Daily Mail hefur það eftir heimildum sínum að hópur leikmanna hafi talað saman á samskiptaforritinu WhatsApp þar sem þeir hafi lýst áhyggjum sínum.

Þeir eru sagðir áhyggjufullir yfir því að byrja spila aftur á meðan fólk er enn að láta lífið vegna veirunnar á Englandi. Í samtalinu munu leikmenn fá tækifæri á því að viðra þeirra skoðanir.

Ljóst er að miklir peningar eru í húfi fyrir félögin sem vilja ólm byrja að spila aftur til að glutra ekki sjónvarpsamningum og öðrum tekjum. Að öllum líkindum mun draga til tíðinda í vikunni hvað verður um tímabilið 2019/2020 í enska boltanum.