Justin Bieber segist sjá eftir því að hafa ekki verið skírlífur fram að hjónabandi. „Ég veit að það hljómar fáránlega. Kynlíf getur verið mjög flókið þegar þú átt í líkamlegu sambandi við einhvern,“ sagði hann í þættinum The Biebers on Watch sem hann og Hailey Baldwin, konan hans, streyma á Facebook.
Baldwin sagðist sammála því að sambönd yrðu flóknari þegar fólk stundaði kynlíf. Hún myndi sjálf ekki breyta neinu í sambandi við það. Þáttinn má sjá í spilaranum hér að neðan en þau ræða þetta á 39. mínútu.
Bieber og Baldwin trúlofuðu sig á Bahamaeyjum í júlí 2018 og giftu sig aðeins tveimur mánuðum síðar í leyni. Í september 2019 endurnýjuðu þau heitin og héldu upp á hjónabandið með fjölskyldum og vinum.
