Anníe Mist sá mikla breytingu á Katrínu Tönju

Anníe Mist Þórisdóttir og Katrín Tanja Davíðsdóttir halda áfram að gleðja áhugasama og aðdáendur sínu með hlaðvarpsþætti sínum en Dóttir-spjallið hefur gefið góða innsýn í það hvernig þær hugsa sem og hvernig þær byrjuðu í CrossFit íþróttinni.

Í þætti fimm var komið að því að fara yfir það hvernig Katrín Tanja Davíðsdóttir tók á einum mestu vonbrigðum ferilsins. Það var árið 2014 þegar henni tókst ekki að tryggja sér sæti á heimsleikunum.

Þú virkaðir frekar áhugalaus

„Þú breyttist. Ég man eftir þér á leikunum 2013 og við vorum aðeins meira í sambandi það ár. Þegar ég var að kanna stöðuna á þér eða spyrja þig hvernig þér liði. Þá var svarið bara: Allt í lagi. Ég hugsaði með mér að þú virkaðir frekar áhugalaus því ég vissi að þú gast gert svo miklu betur,“ sagði Anníe Mist þegar hún rifjaði upp frammistöðu Katrínar á heimsleikunum 2013.

„Ég var ekki að keppa þarna sjálf en eftir keppnina þá fannst mér þú gætir ætlast til meiru af sjálfri þér,“ sagði Anníe Mist og Katrín Tanja tók þá af henni orðið.

„Ég var ekki að standa mig eins vel og ég ætlaði og ég lét eins og það væri allt í lagi svo ég yrði ekki fyrir vonbrigðum,“ sagði Katrín Tanja sem lýsir hegðun sinni þá sem hálfgerðum feluleik til að þurfa ekki að takast á við vonbrigðin.

Vildi ekki láta Anníe sjá sig gráta

„Ég grét örugglega eftir einhverjar greinar en ég vildi bara ekki láta þig sjá það. Nú er allt önnur staða og ég veit að í dag ertu í mínu horni. Það sem er svo mikilvægt er að hafa fólk í sínu horni sem veit hvað þarf að segja og fólk sem er líka hreinskilið. Maður þarf ekki alltaf á hvatningu að halda heldur stundum þarf að tala hreint út við mann,“ sagði Katrín Tanja.

Katrín Tanja komst á heimsleikana árið 2012 og 2013 en árið 2014 náði hún bara sjötta sæti í undankeppni Evrópu og sat eftir með sárt ennið.

„Sú reynsla breytti þér og gerði þig svo miklu sterkari. Ég man eftir því að ég hafði aldrei æft eins mikið með þér og einmitt árið eftir að þú komst ekki á leikana. Þú varst í framhaldinu orðinn uppáhaldsæfingafélaginn minn og við höfðum verið mjög nánar allar götur síðan,“ sagði Anníe Mist og gaf Katrínu Tönju orðið.

Ég trúi því að úr öllu slæmu komi eitthvað gott

„Það eru svo mörg dæmi um að þessi miklu vonbrigði hafi verið blessun í dulargervi. Ég trúi því að úr öllu slæmu komi eitthvað gott. Þú verður bara að finna þessa silfurrönd. Ef þú þarft að komast í gegnum eitthvað þá er ástæða fyrir því,“ sagði Katrín Tanja.

„Það át mig upp að innan að sjá alla hina vera að undirbúa sig fyrir leikana. Ég spurði sjálfa mig af hverju ætti ég að vera að fara á æfingu,“ sagði Katrín Tanja sem ákvað að fara í frí með fjölskyldu sinni til Marokkó.

Katrín Tanja sagði síðan frá því að hún las ævisögu bandaríska hlauparans Michael Johnson, Gold Rush, í þessari ferð þar sem hann fór meðal annars yfir það hvernig hann yfirvann vonbrigðin á ÓL í Barcelona 1992 með því að koma til baka og vinna tvenn gullverðlaun á ÓL í Atalanta 1996.

„Eftir að ég las þessa bók þá hugsaði ég með mér: Ég ætla ekki að láta þessi mistök skilgreina mig. Ég sá allt í einu að þessi reynsla væri bara hluti af ferðalaginu mínu og þegar ég kom til baka þá fór ég að æfa með þér. Ég hafði svo gaman að því að æfa með þér og ég gat líka leyft mér að pressa á þig því ég var ekki að fara á leikana að keppa við þig. Þetta varð til þess að ég var í raun að undirbúa mig fyrir leikana þótt ég væri ekki að fara keppa þar,“ sagði Katrín Tanja.

Við græddum báðar svo mikið á þessu

Katrín Tanja naut heldur betur góðs af þessum æfingum árið eftir því hún komst alla leið á heimsleikana árið 2015 og gott betur því hún stóð uppi sem heimsmeistari í fyrsta sinn.

„Við græddum báðar svo mikið á þessu,“ sagði Anníe Mist sem fékk frábæran æfingafélaga sem ýtti henni áfram og á móti þá hjálpaði Anníe Mist að rífa Katrínu upp úr vonbrigðunum að komast ekki á leikana. Stærsta gjöfin var örugglega að í leiðinni urðu þær miklar vinkonur og eru enn.

Það má hlusta á allt spjallið hjá Anníe Mist og Katrínu Tönju hér fyrir neðan.