Staðfest smit orðin sextíu

Tvö smit kórónuveirunnar greindust til viðbótar í morgun hjá einstaklingum sem báðir komu til landsins með flugi frá Verona á Ítalíu síðastliðinn laugardag. Hafa því fimm einstaklingar úr því flugi greinst með veiruna.

Alls eru greind smit hérlendis orðin 60 talsins. 50 smit hjá einstaklingum sem hafa verið að koma erlendis frá og 10 sem smitast hafa innanlands.

Boðað hefur verið til reglubundins blaðamannafundar hjá almannavarnadeild ríkislögreglustjóra klukkan 14 í dag vegna kórónuveirunnar. Fundurinn verður í beinni útsendingu á Vísi og Stöð 3.