Guðmundur Tyrfingsson gerði sér lítið fyrir og skoraði fimm mörk er Selfoss komst áfram í 2. umferð Mjólkurbikarsins eftir 5-0 sigur á Snæfell á Selfossi í dag.
Guðmundur, sem er sautján ára gamall, skoraði tvö mörk í fyrri hálfleik. Þriðja markið kom á 48. mínútu og síðustu tvö mörkin gerði hann af vítapunktinum á síðustu tíu mínútunum.
Sé að það var the Gummi Tyrfings show hjá Selfossi í kvöld. Setti ekki nema 5 stykki, nú þarf ég að finna síðasta skipti sem það hefur gerst hjá leikmanni @selfossfotbolti
— Már Ingólfur Másson (@maserinn) June 5, 2020
ÍR, sem leikur í 2. deild eins og Selfoss, vann 3-1 sigur á 4. deildarliði KÁ. Gunnar Óli Björgvinsson og Axel Kári Vignisson komu ÍR í 2-0 á fyrstu 25 mínútunum en Aron Hólm Júlíusson minnkaði muninn fyrir KÁ á 77. mínútu. Ísak Óli Helgason innsiglaði sigurinn í uppbótartíma.
Njarðvík vann svo 4-0 sigur á 4. deildarliði Smára í Fagralundi en margar kempur, til að mynda Kári Ársælsson og Þórður Steinar Hreiðarsson, leika með Smára. Atli Freyr Ottesen Pálsson gerði tvö mörk og þeir Bergþór Ingi Smárason og Andri Gíslason sitt hvort markið.
Öll úrslit og markaskorarar eru fengnir frá úrslit.net.
