Tvöfaldi CrossFit heimsmeistarinn Katrín Tanja Davíðsdóttir hefur svo sannarlega staðið í fæturna í mikilvægu sendiherrahlutverki sínu fyrir CrossFit íþróttina á þessum óvissutímum í bandarísku þjóðfélagi.
Katrín Tanja Davíðsdóttir tjáði sig um erfið mál á Instagram síðu sinni þegar flestir úr hennar sporti þögðu. Um leið voru líka margir ósáttir með að hvít, íslensk CrossFit kona væri að tjá sig um þetta hitamál í Bandaríkjunum.
Katrin Tanja komst þó að flestra mati vel frá þessum pistli sínum og það sem var mikilvægast í hennar huga var að sitja ekki þögul hjá þegar réttindabarátta blökkumanna þurfti svo sannarlega stuðning frá áhrifavöldum eins og Katrínu Tönju. Katrín Tanja er með 1,8 milljónir fylgjendur á Instagram.
Katrín Tanja var líka tilbúin að gagnrýna harðlega forystu CrossFit samtakanna eftir að framkvæmdastjórinn og stofnandinn Greg Glassman hneykslaði marga með rasísku svari sínu við Twitter-færslu Institute for Health Metrics and Evaluation.
Institute for Health Metrics and Evaluation var þar að lýsa því yfir að raismi væri sannkallað heilbrigðisvandamál. Svar Greg Glassman var hins vegar ómerkilegt og virðingarlaust: „Það er FLOYD-19,“ svaraði Greg Glassman með vísun í kórónuveiruna COVID-19.
Þetta fór ekki aðeins illa í mjög marga heldur var Katrín Tanja tilbúin að tjá sig um mál sem gæti vissulega haft áhrif á hennar framtíð innan CrossFit íþróttarinnar.
„Ég skammast mín, er vonsvikin og reið vegna þess sem hefur verið í gangi síðustu daga hjá samtökum sem ég hef tileinkað mér, lagt svo mikið á mig fyrir og verið svo stolt af að keppa hjá,“ skrifaði Katrín Tanja Davíðsdóttir.
„Ég skrifa ekki undir svona. Þetta eru ekki forystuhæfileikar. Þetta er ekki gott mannlegt eðli,“ skrifaði Katrín Tanja eins og sjá má hér fyrir neðan.
Katrín Tanja hafði áður fylgt eftir fyrsta pistli sínum í síðustu viku með öðrum pistli um réttindabaráttu blökkumanna í heiminum.
„Ég veit þetta ekki ... en ég vil ólm læra. Ég vil spyrja réttu spurninganna. Ég vil skilja þetta betur. Ég vil berjast fyrir því sem er rétt,“ byrjaði Katrín Tanja Davíðsdóttir þann pistil á Instagram síðu sinni.
„Síðasta vika hefur verið mjög erfið og tilfinningaþrungin ... og það versta við það er af hverju núna?! Það er ekki eins og það yrði einhver óvænt breyting. Þetta hefur verið svona alla mína ævi og lengur en það. Eini munurinn er að nú er búið að draga þetta fram í ljósið og menn eru kallaðir til ábyrgðar,“ skrifaði Katrín Tanja.
„Í fullri hreinskilni þá skammast ég mín ákaflega mikið fyrir þekkingarleysið mitt. Ég skammast mín af því ég sá aldrei kynþætti. Ég sá ekki vandamálið. Ég skammast mín fyrir að hafa ekki staðið upp og tjáð mig fyrr. Ég skammast mín líka fyrir það að gera mér ekki grein fyrir að þetta mikla óréttlæti lifir enn góðu lífi í okkar heimi,“ skrifaði Katrín Tanja.
„Það besta sem við getum gert í að breyta hlutunum er að byrja á okkur sjálfum. Opnum huga okkar. Opnum hjörtu okkar. Lærum. Fræðum okkur sjálf og setjum meiri kröfur á fjölskyldumeðlimi, vini okkar og kollega,“ skrifaði Katrín Tanja.
Katrín Tanja Davíðsdóttir býður líka fram hjálp sína um að koma upplýsingum til skila um hvernig hún eða aðrir geta hjálpað. Hún endar síðan pistil sinn síðan á myllumerkinu „#BlackLivesMatter“ eða „líf svartra skipta máli“ sem eru einkunnarorð réttindabaráttu svartra í dag.
