Matvöruverslun sem virkar eins og strætó

Í verslunum sjást víða merkingar þar sem fólk er beðið um að halda tveggja metra fjarlægðarmörkunum og þetta á við um verslanir hér heima sem erlendis. Nú ætlar kanadíska nýsköpunarfyrirtækið Grocery Neighbour sér stóra hluti á matvörumarkaðinum þar sem hugmyndin byggir meðal annars á því að fólk muni til framtíðar vilja halda fjarlægð við ókunnuga til dæmis þegar það verslar. Grocery Neighbour er því matvöruverslun á hjólum sem keyrir um hverfið líkt og ísbíllinn góði.

Matvöruverslun á hjólum er reyndar ekki ný á nálinni og í frétt BBC Worklife segir til dæmis að slíkar verslanir séu starfræktar í Oklahoma og Kaliforníu í Bandaríkjunum. Þær verslanir eru hins vegar með vöruúrval sem að mestu byggir á framleiðslu úr landbúnaði og sveitum. Grocery Neighbour ætlar sér hins vegar í samkeppni við stóru matvöruverslanirnar og er vöruúrvalið í samræmi við það.

Ferskmeti ýmiss konar, allt frá kjöt og fisk er á boðstólnum auk ýmissa annarra vara sem hefðbundnar eru til heimilis- og matarframfærslu. Viðskiptavinir geta fengið tilkynningu um það í sérstöku appi hvenær rútan er í hverfinu þeirra eða næst er von á henni en að öllu jöfnu gengur rútan eins og strætó þar sem hver rúta fer sína eigin leið.

Nú þegar hefur fyrirtækið hafið rekstur á þremur verslunarrútum en markmiðið er að þær verði orðnar eitt þúsund talsins innan tveggja ára. 

Forsvarsmenn eru bjartsýnir á þessi áform enda segja þeir að í upphafi hafi þeir sjálfir talið að verslunarrútan myndi fyrst og fremst henta markhópum eins og eldri borgurum. Reynslan hafi hins vegar strax sýnt að markhópurinn er mun fjölbreyttari þar sem allir aldurshópar eru að nýta sér rúturnar.