Lærir mikið af suður-amerísku kempunum

Hinn átján ára gamli Andri Fannar Baldursson hefur fengið mörg stór tækifæri með ítalska úrvalsdeildarfélaginu Bologna á þessari leiktíð. Á þremur vikum hefur Andri Fannar m.a. spilað gegn Napoli, AC Milan og Inter.

Andri Fannar gekk fyrst í raðir Bologna í lok janúar 2019 á láni en í samningnum var klásúla um að ítalska liðið gæti keypt hann á meðan á lánssamningnum stæði.

Bologna ákváð að nýta sér þá klásúlu síðasta sumar og þegar Vísir sló á þráðinn til Andra í gær sat hann á hóteli í bænum þar sem hann hefur búið síðustu mánuði.

„Ég er búinn að vera á hótelinu í tvo og hálfan mánuð eða síðan ég kom aftur út eftir kórónuveiruna,“ sagði Andri Fannar en hann er einn á Ítalíu þar sem enginn aðstandandi má koma til hans vegna ferðatakmarkana inn í landið.

„Mér líður vel hérna. Þetta er mikið álag og allt þannig en mér líður ógeðslega vel. Við æfum einu sinni á dag núna því það er spilað þétt.“

Eins og áður sagði á hefur Andri Fannar spilað gegn mörgum af stærstu liðum Ítalíu á undanförnum vikum og hann segir það mikla reynslu fyrir sig.

„Þetta eru virkilega stór lið og skemmtilegt að fá að spila á móti svona stórleikmönnum. Ég er ánægður með mínúturnar sem ég er búinn að fá.“

„Ég er búinn vera standa mig virkilega vel á æfingum og er búinn að fá traustið. Ég tek hverri einustu mínútu fagnandi.“

Goðsögnin Sinisa Mihajlovic er þjálfari Bologna. Hann gerði garðinn frægan hjá Lazio og Sampdoria á sínum leikmannaferli en hefur svo m.a. þjálfað AC Milan og serbneska landsliðið.

„Hann er virkilega góður þjálfari. Hann er með mikinn metnað og er mjög ákveðinn. Hann gefur skýr fyrirmæli og hann lætur menn heyra það ef þarf en einnig styður hann sína menn þegar þess ber undir.“

Síðasta sumar greindist Serbinn með hvítblæði. Andri Fannar segir að þetta hafi tekið á félagið og hópinn en allt hafi endað vel.

„Hann var lengi frá en klúbburinn stóð verulega þétt við bakið á honum. Leikmennirnir líka. Hann fór í gegnum þetta eins og alvöru sigurvegari og er kominn til baka.“

Eins og Andri Fannar benti á er Sinisa ansi harður í horn að taka. Hann hefur lítinn húmor fyrir slakri frammistöðu og því fékk danski landsliðsmaðurinn Andreas Skov Olsen að kynnast en Sinisa gagnrýndi hann mikið á dögunum.

Sagði Serbinn að Daninn hafi ekki sýnt neitt í þeim leikjum sem hann hafi spilað og að hann hefði búist við mikið meira af honum. Hann hefði til 2. ágúst að sýna sig - annars gæti voðinn verið vís í sumar.

„Hann er helvíti ákveðinn og harður fyrir. Daninn er ekki búinn að sýna sitt rétta andlit. Hann var góður í Danmörku en er ekki alveg búinn að sýna sitt rétta andlit hér.“

Í leikmannahópi Bologna má finna reynda leikmenn í bland við yngri og óreyndari leikmenn. Þar á meðal eru þeir Gary Medel og Rodrigio Palacio en sá síðarnefndi spilaði m.a. úrslitaleik HM með Argentínu gegn Þýskalandi árið 2014.

„Medel og Palacio eru mestu kempurnar. Ég hef gaman af þeim. Þeir tala mikið við mig og leiðbeina mér og eru mjög góðir liðsmenn,“ sagði Andri Fannar. En hvaða liðsfélögum eyðir hann mestum tíma með?

„Ég er svona mest með Hollendingunum, Svíanum og Dananum. Við erum allir frekar líkir, sérstaklega Norðurlandabúarnir, en ég reyni að halda sambandi við alla leikmennina og tala við alla.“

Fréttir bárust af því fyrir helgi að nýr fimm ára samningur lægi á borðinu fyrir Andra Fannar en hann vildi ekki mikið gefa upp hvað samninginn varðar.

„Bologna buðu mér fimm ára samning og þetta er allt í vinnslu. Ég var á svona lægsta atvinnumannasamningi núna og átti eitt ár eftir af honum en þeir eru búnir að bjóða mér nýjan og betri samning. Við erum að skoða þetta og þetta kemur í ljós á næstu dögum.“

Það er ljóst að mörg lið renna hýru auga til Andra en átta lið spurðust fyrir um kappann í kórónuveiruhléinu.

„Ég frétti í COVID pásunni að það voru átta lið sem spurðust fyrir um mig. Fimm stórlið á Ítalíu og þrjú á Englandi en ég fékk aldrei að vita liðin, því miður,“ en Andri segist þó ánægður með tækifærið hjá Bologna og vill endurgjalda félaginu traustið.

„Ég er virkilega ánægður hér. Ég vil gefa þessu félagi allt sem ég hef upp á að bjóða og halda áfram að standa mig á æfingum og í leikjum.“

Aðspurður út í A-landsliðið er ljóst að Andri Fannar er með báða fætur á jörðinni. Hann á að baki 34 unglingalandsleiki.

„Það er draumur en ég er voða rólegur yfir þessu. Ég tek eitt skref í einu og hef enga trú á öðru en það sem eigi að koma, það komi. Ég er ekkert að stressa mig á þessu. Ég tek þau verkefni sem ég fæ,“ sagði Andri Fannar léttur í lund áður en hann hélt á ný út í sólina.