Grunur um kórónuveirusmit í Norður-Kóreu

Leiðtogi Norður-Kóreu, Kim Jong-un, kallaði til neyðarfundar eftir að einstaklingur sem grunaður erum að vera smitaður af veirunni laumaðist yfir landamæri Norður- og Suður-Kóreu fyrr í mánuðinum.

Fréttastofa Reuters hefur eftir þjóðarmiðli Norður-Kóreu KCNA að neyðarástandi og útgöngubanni hafi verið komið á í landamærabænum Kaesong vegna málsins.

Hingað til hafa norður-kóresk stjórnvöld haldið því fram að engin kórónuveirusmit hafi greinst í landinu. Því er mögulega um að ræða fyrsta opinbera tilfelli veirunnar í landinu lokaða.

„Neyðaratvik varð í Kaesong þegar að flóttamaður, sem flúði til suðurs, sneri aftur með ólögmætum hætti og virðist smitaður af veirunni skæðu,“ sagði í fréttaflutningi KCNA.

Ekki var tekið fram hvort að sýni hafi verið tekið úr manninum og það rannsakað en greint var frá því að eftir óljósar niðurstöður úr rannsóknum á öndunarfærum og blóði mannsins hafi hann verið settur í einangrun og er smitrakning hafin í kjölfarið.