Björgunarskip slysavarnafélagsins Landsbjargar á Siglufirði var kallað út í dag eftir að aðstoðarbeiðni barst frá vélarvana báti á Skjálfanda.
Útkallið barst rétt eftir hádegið og var þar tekið fram að einn maður væri um borð í bátnum sem væri vélarvana vestur af Flatey úti fyrir Skjálfanda. Siglingin milli Siglufjarðar og bátsins tekur rúmlega tvær klukkustundir en áætlað er að taka bátinn í tog og sigla með hann í höfn á Dalvík.
Samkvæmt tilkynningu Landsbjargar má vænta þess að björgunarskipið komi til hafnar í Dalvík, með bátinn í eftirdragi, á milli 18 og 19 í kvöld.
