Þingkosningum á Nýja-Sjálandi frestað

Jacinda Ardern, forsætisráðherra Nýja-Sjálands, hefur tilkynnt að þingkosningum í ríkinu verði frestað um tæpan mánuð vegna kórónuveirufaraldursins. Vel gekk að takast á við faraldurinn í ríkinu fyrst um sinn, en upp á síðkastið hefur hallað undan fæti og nýsmituðum fjölgað hratt.

Guardian greinir frá því að Ardern hafi ráðfært sig við alla stjórnmálaflokkana sem nú sitja á þingi Nýja-Sjálands um frestun kosninganna. Í kjölfarið hafi hún tekið ákvörðun um að færa kosningarnar til 17. október en þær áttu upprunalega að fara fram 19. september.

Hún segir að kjörstjórn hafi hafnað hugmyndum um að fresta kosningunum um tvær vikur, þar sem það þótti ekki nægur tími til að endurskipuleggja kosningarnar.

Síðastliðinn þriðjudag greindust fyrstu kórónuveirusmitin á Nýja-Sjálandi í rúma 102 daga. Alls eru smitin síðan þá orðin 69. Einna verst er ástandið í Auckland, stærstu borg Nýja-Sjálands, en þar hefur útgöngubanni verið komið á til að hefta útbreiðslu faraldursins.