Fyrsta Mottumarssokkapar Krabbameinsfélagsins var fært í hendur Guðna Th. Jóhannessonar forseta Íslands á Bessastöðum í dag.
Sokkarnir í ár eru hannaðir af Gunnari Hilmarssyni sem starfar sem yfirhönnuður Herrafataverzlunar Kormáks og Skjaldar. Gunnar afhenti forsetanum sokkana í dag í tilefni þess að bráðlega hefst Mottumars.
Mottumars er árlegt verkefni Krabbameinsfélagsins sem er í senn vitundarvakning um krabbamein hjá körlum og fjáröflun fyrir félagið. Ein veigamesta fjáröflun félagsins undanfarin ár hefur verið sala Mottumarssokkanna.
