Íslenska CrossFit konan Katrín Tanja Davíðsdóttir gerði upp ótrúlega helgi sína á heimsleikunum þar sem hún tryggði sér annað sætið með frábærri frammistöðu.
Katrín Tanja hélt áfram uppteknum hætti frá því í fyrri hlutanum og sýndi þrautseigju og keppnisskap sem hún var á endanum verðlaunuð fyrir í mótlok þegar hún fékk verðlaun fyrir að hafa sýnt sannan keppnisanda á leikunum. Katrtín fékk Spirit of the Games verðlaunin.
„Önnur hraustasta kona heims. Ég á svolítið erfitt með að finna réttu orðin núna og það mun taka tíma að melta þetta allt saman. Núna eru orðin sem koma upp í huga minn: Þakklæt og stolt,“ skrifaði Katrín Tanja Davíðsdóttir á Instagram síðu sína.
Hún var að komast á verðlaunapallinn í fjórða sinn á heimsleikunum en þetta var hennar besti árangur síðan hún varð heimsmeistari í seinna skiptið árið 2016.
„Þvílík leið til að enda tímabilið. Þetta hefur verið eitt af mest krefjandi árum mínum til þessa en ég vildi ekki breyta neinu. Hvert einasta ferðlag hefur sína ástæðu og þetta ferðalag færði mér víðara sjónarhorn og meira þakklæti og meðvitund um hverja einustu stund. Þetta ár kenndi mér að drekka í mig hvert móment og fékk mig til að meta hverja sekúndu á keppnisgólfinu,“ skrifaði Katrín Tanja.
Katrín Tanja virtist eflast við hverja raun á heimsleikunum í ár og heillaði alla með jákvæði viðhorfi sínu og ótrúlegum keppnisvilja. Árið byrjaði illa og þar sem hún glímdi við bakmeiðsli sem héldu henni frá æfingum. Katrin Tanja vann sig út úr því og það hjálpaði henni síðan að heimsleikunum seinkaði um tvo mánuði vegna kórónuveirunnar. Katrín nýtti þessa mánuði frábærlega í æfingar og stendur nú uppi sem önnur hraustasta kona CrossFit heimsins.
„Þetta var meira en bara keppnisvikan sjálf á heimsleikunum heldur allt ferðalag okkar þangað og ég legg sérstaklega áherslu á okkur. Þetta hefur verið klikkað en yndislegt ferðalag og uppáhaldshlutinn minn er fólkið sem ég hef með mér í þessu. Þetta er liðsframlag á hverju ári en í ár var það meira en nokkurn tímann fyrr. Mér finnst ég vera heppnasta stelpan í heimi að hafa þetta fólk í mínu lífi,“ skrifaði Katrín Tanja.
„Ég við þakka ykkur öllum fyrir æðislegar kveðjur og skilaboð. Þær skipta mig miklu máli. 2020 fer í bækurnar sem ár til að minnast,“ skrifaði Katrín Tanja eins og sjá má hér fyrir neðan.
