Ragnar meiddur en reiknað með að hann byrji að æfa í vikunni

Ragnar Sigurðsson er enn á meiðslalistanum og var ekki í leikmannahópi FCK sem vann í kvöld 2-1 sigur á C-deildarliðinu Avarta í danska bikarnum.

Ragnar hefur ekki leikið með FCK síðan í landsleikjahléinu en hann fór meiddur af velli gegn Danmörku í Þjóðadeildinni.

Á heimasíðu FCK kemur hins vegar fram að Ragnar, ásamt þeim Andreas Bjelland og Pep Biel, muni byrja að æfa með liðinu í þessari viku.

Þá verður að teljast líklegt að hann verði í íslenska leikmannahópnum fyrir leikinn mikilvæga gegn Ungverjum þann 12. nóvember en hópurinn verður tilkynntur á föstudaginn.

Ragnar hefur fengið nýjan þjálfara hjá FCK en eftir að Ståle Solbakken fékk reisupassann er Jess Thorup, fyrrum þjálfari Genk og Gent í Belgíu, tekinn við liðinu.