Klassísk úr standa alltaf fyrir sínu

Þormar Ingimarsson, eigandi Mari Time ehf, segir fallegt úr sígilda gjöf sem geti fylgt eigandanum til langs tíma. Þormar hefur starfað við dreifingu á úrum og klukkum í 40 ár og segir tískusveiflur eiga við úr eins og aðra fylgihluti. Klassísk úr standi þó alltaf fyrir sínu.

„Fólk vill halda í úrið sitt, það þekkjum við vel í úrabransanum. Úr geta líka verið safngripir og margir safna úrum hér á landi og úti um allan heim. Tískan er sterk í úrum og þar skiptir máli að tengjast þekktum tískuhönnuðum eins og t.d. Armani sem sjálfur hefur mikil afskipti af úrum sem bera hans nafn. Þar erum við að tala um vel hannaða stálkassa og listilegar fallegar skífur. Úrið er í mörgum tilfellum hreinn skartgripur,“ segir Þormar en Mari Time er umboðsaðili fyrir Armani úr á Íslandi. Þá eru merki eins og Fossil, MK, Tommy Hilfiger, og Skagen auk Casio undir hatti Mari Time.

Japönsk tískubylting

Þormar segir form og lögun úra lengi framan af ekki hafa tekið miklum breytingum. Svissnesk merki voru fyrirferðarmikil á markaðnum og klassískt útlit ráðandi. Snemma á níunda áratugnum hafi nýtt útlit og form rutt sér til rúms með japönskum merkjum eins og Seiko, Citizen og Casio, ásamt Casio G-Shock sem naut mikilla vinsælda hér á landi og um allan heim.

„Casio G- Schock úrið kom mjög sterkt inn og má segja að það hafi verið eitt af fyrstu úrunum til að ýta af stað tískubyltingu sem náði hápunkti sínum í kringum 1999. Þessi úr eru enn mjög sterk um allan heim og hafa reyndar verið á talsverðri siglingu undanfarin ár,“ segir Þormar.

Sólarhleðlsa og sjálfstrekking

Í dag eru algengustu úrin í klassísku línunni kvartsúr, sem ganga í allt að tvö ár á rafhlöðunni og svo eru sjálftrekkt úr í mikilli sókn. Nú er einnig búið að hanna úr sem ganga á sólarorku og dagsljósi og endast árum og áratugum saman. Til dæmis eru til úr frá Casio sem geta gengið í 20 til 30 ár á sömu hleðslurafhlöðunni.

Snjallúrin komu úrum aftur á úlnliðinn

„Snjallúrin hafa komið sterkt inn síðustu ár og þau hafa ýtt undir notkun á úrum almennt,“ segir Þormar. „Um tíma voru margir farnir að notast eingöngu við símann til að fylgjast með tímanum en nú er fólk farið að nota snjallúr yfir daginn, vegna allra þeirra möguleika sem þau bjóða upp á, en skipta svo um þegar heim er komið og setja þá á sig fallegt klassískt úr,“ segir Þormar.

Bjart framundan fyrir íslenska úrsmíði

„Klassísku úrin verða líka oftar fyrir valinu þegar fólk klæðir sig upp og meðal annars hafa íslensk merki vakið athygli fyrir fallega hönnun og gæði. Þar má nefna JS úrin hjá Gilbert úrsmið og eins úrin hjá Michelesen. Þessir tveir eru í fremstu röð hérlendis í hönnun og framleiðslu úra um þessar mundir. En annars hyllir undir kynslóðaskipti í stéttinni því aldrei hafa fleiri verið við úrsmiðanám eins og núna en sjö nemar, fimm strákar og tvær stelpur, eru að ljúka námi, ýmist frá Danmörku eða Sviss. Það er því nokkuð bjart framundan í íslenskri úrsmíði.“