Sjáðu menntamálaráðherra Íslands gera handahlaup í hvatningarmyndbandi FSÍ

Íþróttafólk Íslendinga hefur lítið getað æft á árinu 2020 vegna kórónuveirufaraldursins og margir þeirra hafa verið í æfingabanni síðan í október.

Fimleikafólk landsins er þar ekki undanskilið. Fimleikasamband Íslands áttar sig á því og reyndi að stappa stálinu í sitt fólk í nýju myndbandi.

Lilja Alfreðsdóttir, Mennta- og menningarmálaráðherra, tekur þátt í myndbandinu en hún sendir ekki bara kveðju. Lilja var í fimleikum sjálf á sínum tíma og fór létt með að skella í eitt handahlaup fyrir myndavélarnar.

„Ég vildi segja við ykkur, ég elska fimleika. Ég var sjálf í fimleikum þegar ég var yngri og mér fannst það frábært. Ég vildi líka segja við ykkur, haldið áfram,“ sagði Lilja Alfreðsdóttir í myndbandinu en það má sjá hér fyrir neðan.

Í myndbandinu tala einnig afreksfólkið Jón Sigurður Gunnarsson g Andrea Sif Pétursdóttir sem hvetja einnig unga fólkið áfram á þessum erfiðu tímum.

„Þetta er svolítið eins og að koma til baka eftir meiðsli. Maður missir mikið úr og þarf að vinna hörðum höndum við að komast aftur til baka. Það er er öðruvísi núna er að við lentum öll í þessum meiðslum. Þannig að við þurfum öll að koma til baka saman,“ sagði Jón Sigurður Gunnarsson.

„Okkar besta fyrir Covid er kannski ekki til staðar strax þegar við byrjum aftur. En þar er líka bara allt í lagi. Við tökum eitt skref í einu og áður en við vitum af verður allt komið til baka og gott betur. Við komum miklu sterkari til baka og þakklát fyrir að fá að æfa íþróttina okkar,“ sagði Andrea Sif Pétursdóttir.

Það má eins og áður sagði sjá allt myndbandið hér fyrir ofan.