Innlent

Ísinn brast undan mótor­hjóla­manni á Hafra­vatni

Kristín Ólafsdóttir skrifar
Maðurinn var kominn í land þegar slökkvilið bar að garði eftir hádegi. Myndin sýnir viðbragðsaðila reyna að ná hjólinu upp úr vatninu.
Maðurinn var kominn í land þegar slökkvilið bar að garði eftir hádegi. Myndin sýnir viðbragðsaðila reyna að ná hjólinu upp úr vatninu.

Maður á mótorhjóli datt ofan í Hafravatn þegar ísinn á vatninu brast undan honum skömmu eftir hádegi í dag. Maðurinn var kominn í land af sjálfsdáðum þegar viðbragðsaðilar komu á staðinn en var fluttur blautur og hrakinn á sjúkrahús.

Eyþór Leifsson hjá slökkviliði höfuðborgarsvæðisins segir í samtali við Vísi að maðurinn hafi ásamt öðrum ekið á mótorhjóli á ísilögðu Hafravatni um hádegisbil. Ísinn hafi brotnað undan hjóli mannsins um tuttugu metrum frá landi.

„Heilmikið viðbragð“ hafi verið sent á staðinn en maðurinn hafi verið kominn í land þegar slökkvilið bar að garði. Þaðan var hann fluttur á slysadeild, ómeiddur en kaldur og blautur. Líkt og áður segir var maðurinn á ferð á ísnum með öðrum en féll einn ofan í vatnið.

„Svo voru smá framkvæmdir að ná hjólinu upp úr vatninu en við erum allir komnir heim núna,“ segir Eyþór.

Í myndskeiðinu hér fyrir neðan sjást viðbragðsaðilar vinna við að koma mótórhjólinu upp úr vatninu eftir hádegi í dag.

Slökkvilið Mosfellsbær

Mest lesið


Fleiri fréttir

Sjá meira


×

Mest lesið