Sjáðu þegar Ronaldo sló met Pelé

Með mörkunum tveimur komst Ronaldo upp fyrir Pelé þegar mörk með félagsliði og landsliði eru tekin saman. Ronaldo hefur nú skorað 758 mörk á ferlinum, einu meira en Pelé gerði á sínum tíma.

Ronaldo kom Juventus yfir með föstu skoti í fjærhornið á 31. mínútu. Staðan var 1-0 í hálfleik, Juventus í vil.

Í upphafi seinni hálfleiks gaf Ronaldo stungusendingu á Federico Chiesa sem kom Juventus í 2-0. Á 70. mínútu skoraði Ronaldo svo sitt annað mark eftir sendingu frá Rodrigo Bentancur.

Marvin Zeegelaar minnkaði muninn fyrir Udinese á 90. mínútu en þremur mínútum síðar skoraði Paolo Dybala fjórða mark ítölsku meistaranna. Mörkin úr leiknum má sjá hér fyrir neðan.

Juventus er í 5. sæti ítölsku úrvalsdeildarinnar með 27 stig, tíu stigum á eftir toppliði AC Milan sem er einmitt næsti andstæðingur Juventus. Liðin mætast á San Siro á miðvikudaginn.

Ronaldo er markahæstur í ítölsku úrvalsdeildinni með fjórtán mörk í aðeins ellefu leikjum.

Ítalski boltinn, Serie A, er á Stöð 2 Sport en upplýsingar um útsendingar má finna hér. Serie A er hluti af Stöð 2 Sport erlent sem kostar 3.990 krónur á mánuði en einnig má kaupa útsendingar sem stakan viðburð á 990 krónur.