Aron Einar sagði söguna af húðflúrinu svakalega í viðtali við heimasíðu FIFA

Blaðamaður hjá heimasíðu Alþjóða knattspyrnusambandsins fer í upphafi greinarinnar yfir sögu Arons Einars sem varð fyrirliði íslenska landsliðsins aðeins 23 ára gamall. Hann er líka búinn að leiða íslenska landsliðið inn á tvö stórmót þar á meðal HM í Rússlandi 2018.

Heimir Hallgrímsson hrósar líka Aroni Einari í upphafi greinarinnar en auk áranna í landsliðinu þá hafa þeir verið saman hjá Al Arabi í Katar undanfarin tvö ár.

„Hann er lifandi dæmi um okkar gildi og það sem við viljum standa fyrir. Hann er það inn á vellinum þar sem hann stjórnar leik liðsins en líka utan hans þar sem er alvöru fyrirmynd um það hvernig menn eiga að styðja við bakið á hverjum öðrum. Ofan á þetta allt þá er hann bara mjög góður fótboltamaður,“ sagði Heimir Hallgrímsson í greininni.

Aron Einar ræðir lífið og fótboltann í Katar þar sem hann hefur verið undanfarin ár. Hann er líka spurður út í komandi heimsmeistaramót sem fer einmitt fram í Katar árið 2022. Aron Einar er líka spurður út í Erik Hamrén og hvað hafi klikkaði í undankeppni EM.

„Erik var mjög óheppinn með öll meiðsli leikmanna. Við vorum án fullt af lykilmanna á meðan hann var þjálfari liðsins. Við vorum samt svo nálægt því að komast á EM þar sem við töpuðum á lokamínútunni í umspilinu. Það var mjög erfitt að sætta sig við það,“ sagði Aron Einar Gunnarsson.

Aron Einar segir að Arnar Þór Viðarsson og Eiður Smári Guðjohnsen séu núna teknir við þjálfun landsliðsins.

„Nú erum við komnir með nýja þjálfara og ég held að við eigum alvöru möguleika á því að komast upp úr okkar undanriðli í undankeppni HM. Þýskaland er þarna og er sigurstranglegasta liðið í riðlinum en svo er það við, Rúmenía, Norður-Makedónía, Armenía og Liechtenstein. Ég er vongóður um að við stöndum okkur vel og strákarnir eru staðráðnir að komast aftur á HM. Það eru líka frekar margir leikmenn komnir yfir þrítugt núna og við vitum að þetta verður líka okkar síðasta tækifæri,“ sagði Aron Einar.

Blaðamaður FIFA spurði Aron Einar líka út í húðflúrið svakalega á bakinu en þar nær skjaldarmerki Íslands yfir allt bakið hans.

„Það skiptir mig miklu máli að spila fyrir Ísland. Það er eitthvað sérstakt að koma fram fyrir lönd lítillar þjóðar. Þér finnst þú vera litli gæinn sem þarf að berjast af meiri krafti en hinir,“ sagði Aron Einar og hélt áfram.

„Í sambandi við húðflúrið þá vildi ég gera eitthvað sérstakt og þýðingarmikið eftir Evrópumótið 2016. Það var íslenskur maður sem gerði þetta fyrir mig. Hann kom fjórum sinnum til Cardiff og vann við þetta í tvo daga í senn í hvert skipti sem hann kom,“ sagði Aron.

„Einu sinni var hann að í sjö tíma samfellt. Þegar ég bar þessa hugmynd fyrir hann þá sagði hann: Ertu viss? Því íslensku fánaliturinn mun ná yfir hrygginn og þú munt finna mikið til,“ sagði Aron Einar.

„Ég get líka viðurkennt það að hann var ekki að ljúga,“ sagði Aron Einar hlæjandi. „Þetta var bara eitthvað sem mig langaði virkilega að gera og ég sé ekki eftir því í dag,“ sagði Aron Einar en það má finna allt viðtalið við hann hér.