Barnabarnabarn Mussolinis semur við Lazio

Romano Floriani Mussolini, sem er nýorðinn átján ára, er sonur stjórnmálakonunnar Alessöndru Mussolini sem sat meðal annars á Evrópuþinginu. Hann leikur sem hægri bakvörður.

„Það er ekkert að segja. Ég held mig á hliðarlínunni. Sonur minn vill ekki að ég skipti mér af hans persónulega lífi og þeim ákvörðunin sem hann tekur,“ sagði Alessandra Mussolini við ítalska fjölmiðla eftir að greint var frá því að sonur hennar hefði samið við Lazio.

Félagið hefur oft verið tengt við öfga hægri stefnu en margir af hörðustu stuðningsmönnum þess hafa verið þekktir fyrir að heilsa að fasistasið og beita leikmenn andstæðinga Lazio kynþáttafordómum.

Þjálfari Romanos Mussolini í unglingaliði Lazio, Mauro Bianchessi, kveðst ánægður með hann og segir að hann eigi framtíðina fyrir sér.

„Hann er auðmjúkur strákur sem kvartar aldrei, jafnvel ekki þegar hann spilaði ekki í tvö ár. Ég hef mikið álit á honum. Hann vantar reynslu en lofar góðu,“ sagði Bianchessi sem lætur eftirnafn stráksins ekki trufla sig.

„Ég hef aldrei talað við foreldra hans og það eina sem skiptir máli er hvort hann á skilið að spila, ekkert annað.“

Ítalski boltinn, Serie A, er á Stöð 2 Sport en upplýsingar um útsendingar má finna hér. Serie A er hluti af Stöð 2 Sport erlent sem kostar 3.990 krónur á mánuði en einnig má kaupa útsendingar sem stakan viðburð á 990 krónur.