Guardiola reiknar með að Liverpool spili sinn besta leik á tímabilinu í dag

Ríkjandi Englandsmeistarar Liverpool þurfa nauðsynlega á sigri að halda til að hleypa toppliði Manchester City ekki í yfirburðarstöðu á toppi deildarinnar.

Pep Guardiola, stjóri Man City, iðaði í skinninu þegar hann var spurður út í undirbúning síns liðs fyrir leikinn á blaðamannafundi í gær.

„Ég er ekki hræddur. Mér gæti ekki verið meira sama um hver andstæðingurinn er. Við hræðumst engan.“

„Ég held að það sama gildi um þá. Allir knattspyrnustjórar og öll lið trúa því að þau geti unnið hvern sem er,“ sagði Guardiola.

Margir telja að Man City eigi deildarmeistaratitilinn vísan en liðsmenn Guardiola hafa verið afar sannfærandi upp á síðkastið.

„Það sem á allan minn hug er að við náum að halda áfram að bæta okkur og bæta okkar leik. Og að sjálfsögðu líka að halda áfram að ná úrslitum. Ef við spilum illa og andstæðingurinn gerir betur munum við óska þeim til hamingju,“ segir Guardiola.

Liverpool og Man City hafa skipt með sér tveimur efstu sætunum síðustu tvær leiktíðir en eins og staðan er í dag eru Man Utd og Leicester á milli Man City (1.sæti) og Liverpool (4.sæti). Takist Liverpool að leggja Man City að velli í dag er útlit fyrir æsispennandi baráttu um Englandsmeistaratitilinn.

Guardiola gerir sér grein fyrir því að það sé allt undir hjá Liverpool.

„Við þurfum að eiga góðan leik til að vinna þá. Þeir eru meistararnir. Þeir munu verða besta útgáfan af sjálfum sér. Þeir munu verða agressívir og þeir munu gera allt til að vinna. Ég efast ekki um það.“

„Þeir verða hungraðri í sigur en nokkru sinni fyrr og við þurfum að vera vel undirbúnir. Við þurfum að vera tilbúnir, ná upp okkar leik og hafa hugrekki til að vinna leikinn,“ segir Guardiola.

Fylgst verður með hverju skrefi á Anfield í beinni textalýsingu á Vísi.