Valsmenn áttu fá svör við kraftmiklu Stjörnuliði í gærkvöldi og töpuðu með átta marka mun, 27-35, þrátt fyrir að vera á heimavelli sínum á Hlíðarenda.
Það er óhætt að slá því upp að Patrekur Jóhannesson sé kominn með gott tak á Snorra Steini Guðjónssyni.
Leikurinn var sjöundi leikurinn í röð á Íslandsmótinu þar sem Patrekur vinnur Snorra Stein. Snorri Steinn vann síðast sigur á liði undir stjórn Patreks þegar Valur vann Selfoss á Selfossi 28. september 2017.
Patrekur hefur fagnað sigri í öllum innbyrðis leikjum þeirra í Olís deildinni síðan en þrír af þeim voru í undanúrslitum úrslitakeppninnar vorið 2019.
Patrekur þjálfaði Selfoss í sex af þessum sjö leikjum og í þeim var Snorri Steinn einnig með Guðlaugur Arnarsson sér við hlið.
Snorri Steinn hefur reyndar fagnað sigri á Patreki á þessum tíma því hann stýrði Val til sigurs á Selfossi í bikarnum 18. febrúar 2019 en sá leikur var í átta liða úrslitum bikarkeppninnar.
Leikirnir á Íslandsmótinu hafa hins vegar allir unnist af liðum undir stjórn Patreks.
Síðustu leikir liða Patreks og Snorra Steins í Olís deild karla:
- 2020-21
- Patrekur (Stjarnan) vinnur 8 marka sigur á Snorra (Val) í deildinni (35-27)
- 2018-19
- Patrekur (Selfoss) vinnur 3 marka sigur á Snorra (Val) í úrslitakeppninni (29-26)
- Patrekur (Selfoss) vinnur 1 marks sigur á Snorra (Val) í úrslitakeppninni (32-31)
- Patrekur (Selfoss) vinnur 1 marks sigur á Snorra (Val) í úrslitakeppninni (35-34)
- Patrekur (Selfoss) vinnur 1 marks sigur á Snorra (Val) í deildinni (26-25)
- Patrekur (Selfoss) vinnur 4 marka sigur á Snorra (Val) í deildinni (28-24)
- 2017-18
- Patrekur (Selfoss) vinnur 5 marka sigur á Snorra (Val) í deildinni (34-29)
- Snorri (Valur) vinnu 8 marka sigur á Patreki (Selfoss) í deildinni (31-23)