„Ég hef logið því að heiminum að allt sé í lagi og mér líði vel“

„Það er mín ósk og minn draumur að þetta taki enda,“ sagði söng­konan í máli sínu fyrir dómaranum. Þar stað­festi hún það sem margir að­dá­endur hennar hafa haldið fram um nokkurt skeið; að henni líði hræði­lega undir valdi föður síns, valdi sem hún telur hann mis­nota í sí­fellu.

Brit­n­ey var svipt sjálf­ræði eftir að hún var nauðungar­vistuð á geð­deild árið 2008 eftir að hafa fengið tauga­á­fall.

Svo reið að það nær engri átt

„Ég hef logið því að öllum heiminum að allt sé í lagi og mér líði vel“ sagði Brit­n­ey við dómarann í dag. Hún hafi verið í af­neitun hingað til og talið sér trú um að ef hún segði sjálfri sér nógu oft að henni liði vel færi henni að gera það. „Ég er í losti og á­falli. Ég er svo reið að það nær engri átt.“

Hún segir að hún hafi ekki vitað fyrr af þeim mögu­leika að sækja um það hjá dómara að hljóta sjálf­ræði sitt aftur og henni hafi verið sagt að til að gera það þyrfti hún að gangast undir mat geð­lækna.

„Ég er hrædd við fólk. Ég treysti ekki fólki eftir það sem ég hef gengið í gegn um,“ sagði söng­konan til að skýra það að hún hafi ekki viljað gangast undir annað geð­mat.

Hún bað dómarann um að veita henni sjálfræði sitt aftur án þess að þurfa að vera metin aftur af læknum.

Fær ekki að fjarlægja lykkjuna

„Það er ekki í lagi að neyða mig til að gera hluti sem ég vil ekki gera… Ég trúi því raun­veru­lega að þetta fyrir­komu­lag sé mis­þyrmandi. Mér líður ekki eins og ég geti lifað lífinu til fulls.“

Hún sagðist þá vilja giftast og eignast börn en að hún sé með lykkjuna og fái ekki leyfi frá föður sínum til að láta lækni fjar­lægja hana. Lykkjan er lang­tímagetnaðar­vörn sem er komið fyrir í legi kvenna.

Brit­n­ey á kærasta, leikarann Sam Asghari, en hún segist til dæmis vilja fá að ráða því sjálf hvort hún fari með honum í bæjar­ferð eða ekki. Hún vill þá draga úr þeirri sál­fræði­með­ferð sem hún hlýtur viku­lega.