Mikael hefur verið í einangrun síðan hann greindist í síðustu viku og hefur ekkert leikið með Midtjylland af þeim sökum. Hann var enn utan hóps hjá liðinu er það vann öruggan sigur á Vejle í kvöld.
Gustav Isaksen, Erik Sviatchenko, Anders Dreyer og Awer Mabil skoruðu mörk liðsins í 4-1 heimasigri.
Elías Rafn Ólafsson sat allan tímann á varamannabekk Midtjylland, en Jonas Lössl, fyrrum markvörður Huddersfield og Everton, ver mark liðsins.
Midtjylland er með níu stig á toppi deildarinnar eftir fjóra spilaða leiki, en fjölmörg lið eiga eftir að spila í fjórðu umferðinni.
Aron Jóhannsson virðist þá enn vera frá vegna meiðsla en hann var ekki í leikmannahópi Lech Poznan sem vann 2-0 heimasigur á Cracovia í pólsku úrvalsdeildinni í fótbolta í kvöld.
Bartosz Salamon og Jakub Kaminski skoruðu mörk liðsins en Poznan er á toppi deildarinnar með sjö stig eftir þrjár umferðir.
