Skjótt skipast veður í lofti hjá Tottenham, en liðið vann 1-0 sigur gegn Englandsmeisturum Manchester City í fyrsta leik tímabilsins í ensku úrvalsdeildinni seinasta sunnudag. Þeir mættu þó með gjörbreytt lið frá þeim leik, en enginn af þeim sem byrjuðu leikinn í kvöld spiluðu gegn City á sunnudaginn.
Það var Lucas Silva sem skoraði eina mark leiksins fyrir portúgalska liðið. Það kom eftir stoðsendingu frá Nuno Santos á lokamínútu fyrri hálfleiks.
Tottenham var mun meira með boltann og stjórnaði leiknum að mestu, en áttu þó ekki eitt einasta skot á markið.
Það má búast við því að Lundúnaliðið mæti með sterkara lið til leiks þegar að seinni leikur liðanna fer fram að viku liðinni á Tottenham Hotspur leikvangnum, en sæti í riðlakeppni Sambandsdeildarinnar er í húfi.
