Simmi Vill tekst í beinni á við Bjarna Ben, sem fær falleinkunn hjá honum sem ráðherra

Fyrst verður þrasað við Bjarna Benediktsson fjármálaráðherra og formann Sjálfstæðisflokksins, en Sigmar fór ófögrum orðum um ríkisstjórnina sem Bjarni fer fyrir í útvarpsviðtali á Bylgjunni í dag. Þar sagði hann Bjarna einnig fá falleinkunn sem efnahagsmálaráðherra.

„Ég hef heilmiklar skoðanir á stöðu mála og hann hefur örugglega svör við því. Það verður gaman að brjóta ísinn með Þrasað á þriðjudögum með Bjarna Ben,“ sagði Sigmar á hringrás sinni á Instagram þegar hann kynnti þáttinn.

Sigmar gaf sýnishorn af þessum heilmiklu skoðunum í Reykjavík síðdegis í dag og sagði um ríkisstjórnina:

„Þau eru bara á kosningaári á leiðinni í kosningar og þau eru þar af leiðandi meira að hugsa um rassgatið á sjálfum sér heldur en þjóðina, bara ef ég má tala íslensku. Menn þora ekki að stíga inn og taka ákvarðanir sem eru til heilla þjóðinni á hættu við að missa vinsældir, því þeir eru bara að hugsa um að fá endurkjör. Þetta er bara grafalvarlegt mál,“ sagði hann og bætti við stjórnarandstaðan væri litlu betri með sínar eftiráskýringar.

Sigmar kallaði eftir allsherjarúttekt á félagslegum áhrifum samkomutakmarkana, sem hann sagði að félagsmálaráðuneyti væri í lófa lagið að ráðast í í samstarfi við fjármálaráðuneytið og heilbrigðisráðuneytið.

Á sama hátt gagnrýndi hann að ekki hefði verið leitast við að laga takmarkanir að ólíkri starfsemi, sagði Sigmar og nefndi dæmi úr eigin rekstri: „Nú rek ég stað sem er 2000 fermetrar. Það að ég fái úthlutað jafn mörgum einstaklingum í fjöldatakmarkönum og staður sem er 300 fermetrar er bara leti kerfisins að nenna ekki að koma með betri reglur.“