Óskar Hrafn: Mikilvægt að menn faðmi hana, umvefji hana og kunni að elska hana

„Já það er rétt, ég er mjög ánægður. Þetta er erfiður völlur að koma á. KA liðið er mjög öflugt, vel spilandi og gott lið. Það að koma hingað og vinna 2-0 nokkuð sannfærandi er ekki auðvelt verk. Maður verður bara að vera auðmjúkur og stoltur af liðinu sínu.“

Breiðablik er búið að spila tvo leiki við KA á fjórum dögum og unnið samanlagt 4-0 og fengið mörk frá fjórum mismunandi leikmönnum. Í heildina hefur Breiðablik skorað 42 mörk í sumar.

„Það er búið að vera saga sumarsins. Við erum búnir að skora mikið af mörkum en eigum engann sem er nálægt því að vera markahæsti leikmaðurinn í deildinni. Við erum með fimm menn sem eru búnir að skora fimm mörk eða meira í sumar. Það er kostur að vera ekki háður einum leikmanni með markaskorun. Við búum svo vel að því að eiga marga menn sem hafa verið að skora. Það sýnir styrkleikann og breiddina í sóknarleiknum.“

KA byrjaði leikinn mun betur en gestirnir. Það tók Breiðablik um tuttugu mínútur að komast almennilega inn í leikinn.

„KA menn byrja af miklum krafti, setja okkur undir pressu og voru vel stemmdir. Þeir eru með gott lið. Þegar þeir fá tíma og pláss þá geta þeir gert manni grikk. Ég ætla ekki að segja að við höfum verið heppnir en ég er glaður að við skildum komast í gegnum fyrsta 20 mínúturnar. Eftir þær fannst mér við hafa stjórn á leiknum, þeir skapa sér í raun enginn færi. Mér fannst við fá fullt af stöðum til að gera vel en við vorum að flýta okkur of mikið á köflum í fyrri hálfleik en ég get ekkert kvartað. Það að koma hingað, vinna og halda hreinu er frábært og liðið á allt hrósið skilið.“

Breiðablik er nú á toppi deildarinnar og með 38 stig, tveimur stigum meira en Valur sem er í öðru sætinu. Liðið er nú í bílstjórasætinu í deildinni og hefur umræðan stundum verið að Breiðablik eigi erfitt með svoleiðis stöður. Óskar gaf ekki mikið út á það.

„Ég hef enga reynslu af því að vera með Breiðablik í toppsætinu þannig ég veit ekki hvað er til í því. Það er alltaf þessi stöðuga pressa sem menn búa við og ég held það sé mikilvægt að menn faðmi hana, umvefji hana og kunni að elska hana. Ég held að það sé mikilvægt, ekki láta pressuna fara að stjóra sér.“

Fylkir er næsti andstæðingur Breiðabliks.

„Það eru fjórar umferðir eftir og okkar bíður erfitt verkefni á sunnudaginn á móti Fylki sem er að berjast fyrir lífi sínu í deildinni. Það er ekki leikur sem er léttvægur eða að við höldum að við getum komið og tekið með vinstri. Það verður erfiðari leikur en þessi. Næsti leikur er alltaf erfiðasti leikurinn og það þarf bara að nálgast hann á þann hátt. Við fáum ekkert fyrir að vera efstir núna. Við þurfum að vera klárir á því hvað það er í okkar fari sem gerir það að verkum að við spilum vel og vinnum leiki. Ef við finnum það á sunnudaginn þá erum við bara í ljómandi góðum málum.“

Pepsi Max deild karla er á Stöð 2 Sport en upplýsingar um útsendingar má finna hér. Pepsi Max deildin er hluti af Stöð 2 Sport Ísland sem kostar 3.990 krónur á mánuði en einnig má kaupa útsendingar sem stakan viðburð á 990 krónur.