Jón Guðni skoraði tvö en Hammarby er úr leik eftir vítaspyrnukeppni

Sænska liðið þurfti að vinna upp tveggja marka forskot Svisslendingana frá fyrri leiknum og Jón Guðni kom Svíunum yfir eftir 48 mínútna leik.

Hann var svo aftur á ferðinni rétt um fimm mínútum síðar þegar að hann skoraði annað mark sitt, og annað mark Hammarby, eftir stoðsendingu frá Mohanad Jeahze.

Ekki var meira skorað í venjulegum leiktíma og því þurfti að grípa til framlengingar. Akinkunmi Amoo kom Hammarby í 3-0 eftir rúmlega hundrað mínútna leik, en Arthur Cabral minnkaði muninn átta mínútum síðar. 

Lokatölur 3-1 eftir framlengingu, eins og í fyrri leiknum, og því þurfti að grípa til vítaspyrnukeppni til að skera úr um sigurvegara.

Svíarnir klikkuðu á fyrstu tveim spyrnum sínum og voru því alltaf skrefi á eftir andstæðingum sínum. Andy Pelmard klikkaði á þriðju spyrnu Svisslendingana, en það reyndist eina spyrnan sem liðið klikkaði á.

Basel fer því áfram í riðlakeppni Sambandsdeildarinnar eftir 4-3 sigur í vítaspyrnukeppni, en Jón Guðni og félagar sitja eftir með sárt ennið.