Sigurgeir segir Covid faraldurinn hafa átt sinn hlut í því að hann lagði í þetta verkefni, en hann hafði aldrei áður lagt í svona langsund.
Úr bardagaíþrótt í langsund
„Vegna Covid gat ég ekki keppt í minni íþrótt, sem er Lethwei hjá Iceland Combat Arts. Þá fer ég að hugsa um eitthvað annað til að einbeita mér að og ákveð að leggja í þetta sund. Þá fæðist þessi hugmynd að gera þetta að styrktarverkefni. Það er tilvalið að láta eitthvað gott af sér leiða fyrst maður er að þessu á annað borð.“
En af hverju urðu Einstök börn fyrir valinu?
„Ég vissi bara að þau eru að vinna gott starf og þurfa á hjálp að halda.“

Marglyttufár breytti fyrra plani
Fyrst ætlaði Sigurgeir, sem býr austur á fjörðum og starfar í álveri Alcoa á Reyðafirði, að synda frá Eskifirði til Reyðarfjarðar, en marglyttutorfa á leiðinni setti þar strik í reikninginn.
„Það fylltist allt af brennihveljum á leiðinni. Ég prófaði aðeins að synda með þeim og það var ekkert mjög gaman að fá þær í sig.“
Því var ákveðið að færa verkefnið vestur á bóginn og þreyta sundið yfir Kollafjörð, og lagði Sigurgeir af stað á þriðjudaginn með aðstoðarmenn sem fylgdu honum á báti.

Tók ekki í mál að hætta við
Sundið gekk ágætlega fyrst um sinn, en þegar komið var að tanganum á Kjalarnesi kom babb í bátinn, í orðsins fyllstu merkingu.
„Þá bilar báturinn og ég mátti þá synda í hringi í einn og hálfan klukkutíma á meðan strákarnir reyndu að koma honum í gang. Þeir ætluðu svo að flauta þetta af, en ég tók það ekki í mál. Þrjóskan í mér leyfir ekkert svona. Þannig að þeir hringdu í Hafsport sem höfðu stutt okkur vel, sem sendu annan bát og við gátum haldið áfram.“

„Naut eiginlega sársaukans daginn eftir“
Sigurgeir kom svo loks í land eftir níu klukkustunda barning, hérumbil að niðurlotum kominn, en sáttur við sína frammistöðu. Eins og fyrr segir er leiðin 11,6 kílómetrar, en með öllum útúrdúrum í tengslum við vélarbilunina á leiðinni var heildarvegalengdin mun lengri, enda var sundkappinn ansi lerkaður eftirá.

„Ég var með alveg svakalega verki í öllum liðum daginn eftir, en þetta er bara partur af þessu. Ég naut eiginlega sársaukans daginn eftir, því að ég vissi hvaðan hann var að koma.“
Þess má geta að söfnunin stendur enn yfir og má leggja málefninu lið á vef Einstakra barna.